Արմեն Գեւորգյանը՝ Իրաքյան Քուրդիստանում

ՀՀ փոխվարչապետ, Տնտեսական համագործակցության հարցերով հայ-իրաքյան միջկառավարական համատեղ հանձնաժողովի համանախագահ Արմեն Գեւորգյանի գլխավորած պատվիրակությունն այսօր Էրբիլում հանդիպեց Իրաքյան Քուրդիստանի նախագահ Մասուդ Բարզանիի հետ:

Քուրդիստանի նախագահը ողջունեց հայկական պատվիարկության այցը Էրբիլ՝ նշելով, որ նման փոխայցելությունները խթան կհանդիսանան բարեկամ ժողովուրդների միջեւ կապերի զարգացման համար: Նա ընդգծեց, որ Իրաքյան Քուրդիստանը շահագրգռված է Հայաստանի հետ լայն համագործակցության հաստատումով եւ խորացումով, ինչպես նաեւ կողջունի հայկական գործարար ներկայությունը Քուրդիստանում: Մ. Բարզանիի խոսքով՝ հայ եւ քուրդ ժողովուրդների դարավար բարեկամությունը, ինչպես նաեւ Քուրդիստանում հայ համայնքի եւ Հայաստանում քրդական համայնքի առկայությունը դրա համար լավ հիմքեր են ստեղծում:

Փոխվարչապետը շնորհակալություն հայտնեց ջերմ ընդունելության համար՝ նույնպես ընդգծելով հարաբերությունների զարգացման հայկական կողմի պատրաստակամությունը: Նա տեղեկացրեց միջակառվարական հանձնաժողովի նիստի արդյունքների մասին՝ մասնավորապես անդրադառնալով էներգետիկ եւ նավթագազային ոլորտներում ձեռք բերված պայմանավորվածություններին: Ա. Գեւորգյանը վստահություն հայտնեց, որ հայ-իրաքյան հարաբերություններում Քուրդիստանի հետ փոխգործակցությունը կարող է կարեւոր դերակատարում ունենալ:

Զրուցակիցները քննարկեցին առեւտրատնտեսական համագործակցության զարգացման հնարավորություններն ու հեռանկարները:

Փոխվարչապետը շնորհակալություն հայտնեց Մասուդ Բարզանիին՝ հայ համայնքի նկատմամբ բարեկամական վերաբերմունքի համար: Կողմերն անդրադարձան նաեւ տարածաշրջանային խնդիրներին: Փոխվարչապետը խաղաղություն եւ բարօրություն մաղթեց քուրդ ժողովրդին եւ հաջողություններ՝ երկրի անվտանգությանն ու կայունությանն ուղղած իշխանությունների ջանքերին: