ՀՀԿ-ի անփոխարինելի և միակ թեկնածուն Սերժ Սարգսյանն է

«Այսօրվա նիստում մենք վերջնական որոշեցինք դեկտեմբերի 15-ի օրակարգը: Օրակարգում կլինի միայն մեկ հարց՝ նախագահի թեկնածուի հարցը»,- ՀՀԿ գործադիր մարմնի նիստի ավարտից հետո լրագրողների հետ զրույցում ասել է ՀՀԿ մամլո խոսնակ Էդուարդ Շարմազանովը: ԳԱԼԱ-ի լրագրողի այն հարցին, թե հնարավո՞ր է նիստում, բացի Սերժ Սարգսյանից, այլ թեկնածուի հարց քննարկվի, կուսակցության մամլո խոսնակը պատասխանել է. «ՀՀԿ-ում ինչպես կարող է լինել այլ անձի ընտրության հարց, եթե ՀՀԿ-ն ընտրել է իր նախագահին, Հանրապետականն իրականացնում է քաղաքականություն կուսակցության ղեկավարի գլխավորությամբ, եւ մեր ղեկավարի կառավարման շրջանում Հայաստանում թե՛ բարոյական, թե՛ քաղաքական ճգնաժամը հետընթաց է ապրել, եւ այսօր մենք ձեզ հետ միասին ականատեսն ենք քաղաքական, ժողովրդական լայն համակարգի»:

Նշենք, որ Հովիկ Աբրահամյանն այսօր ՀՀԿ գործադիր մարմնի նիստին ներկա չէր: Էդուարդ Շարմազանովը նշել է, որ ԱԺ նախագահը հարգելի պատճառներով չի ներկայացել այսօրվա նիստին: Անդրադառնալով հոկտեմբերյանցիների բողոք-դժգոհություններին՝ Շարմազանովը նշել է. «Կատարյալ հանգստությունը հենց այդտեղ է: Մենք գիտենք, որ կան բազմաթիվ խնդիրներ, կան բազմաթիվ քաղաքական ուժեր, ապագայում բազմաթիվ դիմակազերծումներ են սպասվում մեզ եւ այդ իմաստով ինչո՞ւ պետք է հանգիստ անցնի ՀՀԿ-ի նիստը»: Կմիանա՞ արդյոք Հանրապետական կուսակցությունը ինչպես ԲՀԿ-ի, այնպես էլ ՀՅԴ-ի առաջարկներին, ՀՀԿ մամլո խոսնակը նշել է. «Մենք որեւէ քաղաքական ուժի հետ կոնսուլտացիաներին ոչ արձագանքել ենք, ոչ արձագանքում ենք, ոչ մասնակցում ենք: Մենք օրակարգ ձեւավորող քաղաքական ուժ ենք, եւ ինքներս ենք որոշում, թե ինչ օրակարգ ձեւավորենք: ՀՅԴ-ն լուրջ քաղաքական ուժ է եւ հույսով եմ, որ այդ կուսակցությունը, ի տարբերություն ՀԱԿ-ի, պրոյեկտ չէ: ՀՅԴ-ն կուսակցություն է, որն ունի գաղափարախոսություն, իսկ ՀԱԿ-ը կարճատեւ նախընտրական պրոյեկտ է: Նրանց ներկայացուցիչների ելույթներից պարզ է դառնում, որ 7 հոգով 8 երգ են երգում»,- ասել է ՀՀԿ մամլո խոսնակը:

Փայլակ Ֆահրադյան՝ «Գալա»