«ՀԺ». Արշալույս Փայտյանը չի՞ պատժվի

ՀՀ պաշտպանության նախարարության քննչական վարչությունում քննվող «գոմեշի մսի» պայմանական անունը կրող քրեական գործում ՀՀ ԶՈԻ շտաբի պետի նախկին տեղակալ Արշալույս Փայտյանը որևէ կարգավիճակով ներգրավված չէ՝ երեկ «Հայկական ժամանակ»-ի թղթակցի հարցին ի պատասխան ասել է ՊՆ քննչական վարչության ավագ սպա Մերի Սարգսյանը:

Խոսքը բանակի համար գնված գոմեշի մսի հայտնի պատմության մասին է, որի վերաբերյալ նույնիսկ Սերժ Սարգսյանը հրապարակային ելույթ ունեցավ, ուղղակի մեղադրելով ԶՈԻ շտաբի պետի տեղակալին' մատակարարից 200 հազար դոլար, իբր, պարտք վերցնելու համար: Սպասվում էր, որ կոռուպցիայի դեմ հատկապես «վիրահատական միջոցներով» պայքարի այս փուլում Արշալույս Փայտյանը կդառնա առաջին «վիրահատվողը» կամ գոնե առաջիններից մեկը: Բայց նա, ինչպես նշեցինք, նույնիսկ որպես վկա ներգրավված չէ քրգործում: Ինչո՞ւ: Պատասխանը, թերևս, թաքնված է ներկայացված փաստաթղթում: «ՀԺ»-ն տպել է հույժ գաղտնի քաղվածք 2008 թվականի փետրվարի 23-ի ՀՀ պաշտպանության այն ժամանակվա նախարար Միքայել Հարությունյանի թիվ 0038 տխրահռչակ հրամանից: Նաև հենց այս հրամանի հետևանքով այն ժամանակ Երևան մտցվեցին զինված ուժեր, որոնք 2008-ի մարտի 1-ին ակտիվորեն միացան անզեն ու խաղաղ ցուցարարների դեմ իրականացված զինված հարձակմանը: Սպանվեց ՀՀ 10 քաղաքացի: Հենց միայն այս հարձակման «շնորհիվ» Սերժ Սարգսյանը ստանձնեց ՀՀ նախագահի պաշտոնը. չնայած ընտրություններն ակնհայտորեն կեղծվել էին: Եվ ահա, ինչպես երևում է «ՀԺ» ներկայացրած փաստաթղթից, այդ օրերին զինվորականների գործողությունների պատասխանատվությունը դրվել էր նաև ԶՈԻ գլխավոր շտաբի պետի տեղակալ Արշալույս Փայտյանի վրա: Դատելով այն իրողությամբ, որ մարտի 1-ին զոհեր եղան, Արշալույս Փայտյանը չէր թերացել իր պարտականությունների կատարման գործում:

«Այդքանից հետո արժե՞ սպասել, որ Փայտյանը մի ինչ-որ 200 հազար դոլարի համար կպատժվի: Կոռուպցիայի մեջ թաթախված մեր բոլոր պաշտոնյաներն էլ ունեն նմանատիպ ինդուլգենցիաներ: Թե որքանով է լուրջ Հայաստանում սկսված «պայքարը» կոռուպցիայի դեմ կարելի է գնահատել հենց միայն այս օրինակով»,- հավելում է թերթը: