4000 ամերիկացի քվեարկել է Չարլզ Դարվինի օգտին

Մոտ 4000 ամերիկացու ձայն է ստացել ԱՄՆ-ի Կոնգրեսի ներկայացուցիչների պալատի ընտրություններին հայտնի անգլիացի գիտնական Չարլզ Դարվինը (1809-1882)։ Ինչպես նոյեմբերի 8-ին հայտնել են Աթենս Քլարկ շրջանի ընտրատեղամասում, նրա անունը ներառվել է քվեաթերթիկի մեջ տեղի բնակիչների կողմից՝ ի աջակցություն առաջավոր գիտական մտքի, այդ թվում՝ նաև հայտնի դարվինյան էվոլյուցիայի տեսության։

Աշխարհի ստեղծման նման տարօրինակ կարծիքի արտահայտման համար առիթ է հանդիսացել հանրապետական կոնգրեսական Փոլ Բրաունի հայտարարությունը, ով առաջադրվել էր Ջորջիա նահանգում։ Ընտրություններից առաջ իր կողմնակիցների հետ հանդիպման ժամանակ կոնգրեսականն ասել էր, որ Դարվինի տեսությունը, Մեծ պայթյունի տեսությունը և աշխարհի ծագումը բացատրող այլ գիտական տեսություններ «սուտ են, որ գալիս են դժոխքից». մեջբերում է քաղաքական գործչին ИТАР-ТАСС-ը։

Մի շարք ամերիկացիներ գնահատել են այս արտահայտությունը որպես խավարամտություն և արագ ստեղծել են հասարակական կոալիցիա, որը ձեռնարկել է բողոք-գործողություններ։ Երբ մոտեցավ ընտրությունների օրը, ընտրատեղամասեր եկած ամերիկացիներից շատերը քվեաթերթիկում Բրոունի անվան կողքին գրեցին մեկ այլ թեկնածուի՝ Չարլզ Դարվինի անունը և նրա անվան դիմաց արեցին համապատասխան նշանը։

Արդյունքում Աթենս Քլարկում անգլիացի նատուրալիստի օգտին քվեարկել է մոտ 4000 մարդ։ Նրա անունը ներառվել էր նաև հարևան վարչական շրջանների քվեաթերթիկների մեջ, որտեղ վերջնական հաշվարկը կիրականացվի միայն հանգստյան օրերին։ Բողոքի ակցիան, սակայն, չխանգարեց Բրոունին հասնել վերընտրման ԱՄՆ-ի Կոնգրեսի ներկայացուցիչների պալատում։