Der Spiegel. Իրանի մարտական ինքնաթիռները գրոհել են ԱՄՆ-ի անօդաչուների վրա

Նոր լարված իրավիճակ է ստեղծվել ամերիկա-իրանական հարաբերություններում: Պենտագոնի տվյալներով՝ անցյալ շաբաթ իրանական կործանիչները Պարսից ծոցում կրակ են բաց թողել ամերիկյան անօդաչու ինքնաթիռի ուղղությամբ: Օդանավը վայր է ընկել առանց պայթյունի: Ամերիկյան զինվորականները նախազգուշացրել են Իրանին հետագա հարձակումներից:

Չնայած նրան, որ հարձակումն անհաջող ավարտ է ունեցել, այնուհանդերձ, լարելու է առանց այդ էլ լարված հարաբերությունները ԱՄՆ-ի և Իրանի միջև: Պարբերականը հաղորդում է, որ ևս 2 իրանական ռազմական ինքնաթիռ հրթիռներ են արձակել ԱՄՆ-ի անօդաչու կառավարվող ինքնաթիռների ուղղությամբ:

Պենտագոնը հինգշաբթի երեկոյան հաստատել է միջադեպի իրողությունը, որը տեղի է ունեցել նոյեմբերի 1-ին: ԱՄՆ-ի հետախուզության Predator անօդաչու ինքնաթիռներն առավոտյան հարձակման են ենթարկվել Պարսից ծոցում գտնվող իրանական ինքնաթիռների կողմից, սակայն անվնաս մնալով՝ կրկին վերադարձել են ռազմաբազա:

ԱՄՆ-ի Պաշտպանության նախարարությունը միջադեպի մասին անմիջապես տեղյակ է պահել նախագահ Բարաք Օբամային և Պենտագոնի ղեկավար Լեոն Փանեթթային: Ակնհայտ է, որ Թեհրանը շարունակելու է Պարսից ծոցի տարածաշրջանում մարտական գործողություններ իրականացնել. կարծում է Պենտագոնը: «Մեր զորքն ու զինամթերքը պաշտպանելու համար գոյություն ունի հնարավոր գործողությունների լայն շրջանակ՝ սկսած դիվանագիտականից ընդհուպ ռազմական, և եթե դրա կարիքը լինի, մենք չենք հապաղի կիրառել դա»,-հայտարարել է Պենտագոնի մամլո քարտուղարը: Պենտագոնը հաղորդում է նաև, որ ԱՄՆ-ի անօդաչու սարքավորումները գործել են ոչ թե իրանական սահմաններում, այլ միշտ եղել են միջազգային օդային տարածքում: