Հրանտ Բագրատյանի խեղաթյուրված խոսքը և Ստյոպա Սաֆարյանի բարկությունը

«Ժառանգության» վարչության քարտուղար Ստյոպա Սաֆարյանն օրեր առաջ լրագրողների հետ հանդիպմանը կարծիք էր հայտնել, որ «նախագահական ընտրություններում Լևոն Տեր-Պետրոսյանի առաջադրումից վնասներն ավելի շատ կլինեն, քան օգուտը»։

Ըստ «Իրավունք» օրաթերթի հրապարակման՝ ԱԺ ՀԱԿ խմբակցության պատգամավոր Հրանտ Բագրատյանը չի ցանկացել մեկնաբանել Ստյոպա Սաֆարյանի այդ տեսակետը՝ ասելով. «Ստյոպա Սաֆարյանն ո՞վ ա, որ ես իրեն comment անեմ։ Քանի՞ անգամ կարելի է ասել։ Դուք ասում եք մի մարդու մասին, որին չեմ էլ ճանաչում»։

Լուրեր.com-ը զրուցել էր «Ժառանգության» վարչության քարտուղար Ստյոպա Սաֆարյանի հետ, ով արձագանքել էր Բագրատյանի խոսքերին. «Ստյոպա Սաֆարյանն ո՞վ ա, որ ես իրեն comment անեմ», և ինձ չի ճանաչում, նույնատիպ հեգնանքով ու ցինիզմով, «ժողովուրդն ում շունն ա» ոճով իբրև վարչապետ նա կործանեց ու ոչնչացրեց Հայաստանի տնտեսությունը, տնտեսական կարողությունները, սեփականաշնորհման անվան տակ «մեջ-մեջ» արեց ու փոշիացրեց համաժողովրդական սեփականությունը, ինչի համար էլ նրան ճանաչում և հիշում են ՀՀ քաղաքացիներն ու Ստյոպա Սաֆարյանը»։

Հրանտ Բագրատյանի օգնականը անդրադարձել էր Լուրեր.com-ի հրապարակմանը և գրել. «Ստյոպա, հիմա տես ինչ եմ ասում: Չէի ուզում խորանալ, բայց կգրեմ: Ես այս պահին Հրանտ Բագրատյանի օգնականի պարտականություններն եմ կատարում, և երբ «Իրավունքից» Հրանտ Սաֆարյանը զանգեց առավոտյան, ես նրա մոտ էի: Ինքս եմ լսել ինչ ասաց Բագրատյանը: Էդ մուտիլովշիկ տղան հարցրեց` ինչպե՞ս եք մեկնաբանում Ստյոպա Սաֆարյանի այսինչ խոսքերը: Բագրատյանն էլ ասաց` «Ես քեզ չե՞մ ասել, որ չեմ մեկնաբանում ուրիշներին, մանավանդ` ոչ իշխանությունից: Ստյոպա Սաֆարյանն ո՞վ է, որ ես նրան մեկնաբանեմ, դատախա՞զ է, ո՞վ է, որ ստիպված լինեմ մեկնաբանել»:

Այսինքն`Հրանտ Բագրատյանը նկատի չուներ քո անձը, այլ քո զբաղեցրած դիրքը: Դու էլ կարդացել, ու առանց էության մեջ խորանալու խոսել ես: Դու չգիտե՞ս «Իրավունքն» ինչ թերթ է: Թե՞ չես հասկանում ով ինչ է անում ու ինչի համար: Երբ հեռախոսն անջատեց, ես դեռ հարցրեցի` ինչո՞ւ եք ամեն զանգի պատասխանում:

Ի դեպ, բոլոր լրագրողները կարող են վկայել ինչքան լիբերալ ու բաց մարդ է` բոլորին հասանելի, այն պարագայում, որ ասենք` Րաֆֆի Հովհաննիսյանի հետ կապվելու համար միլիոն անգամ պիտի զանգես գործավարին ու նրանից պատասխան ակնակալես, քանի որ Րաֆֆիի հետ անհնար է ուղիղ կապով կապվել: Սա էլ գիտեն բոլոր լրագրողները:

Իսկ նախկին և ներկա աշխատակիցները գիտեն նաև, որ Րաֆֆին իր աշխատողների հետ գրություններով է խոսում, ոչ թե տետատետ: Ասեմ նաև, որ սա առաջին դեպքը չէ, որ Բագրատյանից մեկնաբանություն են խնդրում և նա ամեն անգամ պատասխանում է, որ չի մեկնաբանում ուրիշներին:

Դառնամ Լևոն Տեր-Պետրոսյանի հասցեին քո և քո կուսակցի կողմից ասվածներին: Դուք տարրական հարգանք չունեք երկրի հիմնադիր նախագահի հանդեպ: Կարող ես ինձ մի բան ասել` ինչից է, որ ոչ մի պաշտոնում չհաջողած Րաֆֆի Հովհաննիսյանը կարող է առաջադրվել, իսկ երկրի հիմնադիր նախագահը` ոչ: Սա ի՞նչ հոգեբանություն է ընտրություններից առաջ իրական հակառակորդների վրա ցեխ շպրտելը: Սա՞ է Ձեր մարտավարությունը: Ամո՛թ է, Ստյոպա և Արմեն Մարտիրոսյան: Հերիք եղավ, ինչքա՞ն կարելի է կեղտոտ հնարքների դիմել»։

Այս ամենին ի պատասխան` Սաֆարյանը գրել էր.

«Կարինե՛, ես շատ լավ գիտեմ «Իրավունք» թերթոնին, ինքս բազմիցս խնդիրներ եմ տվել և այլևս որևէ զանգի չեմ պատասխանում: Հրաշալի գիտեմ, թե ինչպես են սադրում: Որքան էլ այդ թերթոնը մամուլ չհամարեմ, որքան էլ իմանամ, թե ինչպես են աշխատում, մի բան ակնհայտ է՝ Բագրատյանն ասել է այդ խոսքերը: Եվ այստեղ մեղավորը ես չեմ:

Եթե ես միայն կարդայի, որ նա ինձ չի մեկնաբանում, ապա ոչ մի ռեակցիա չէր լինի: Բայց երբ տեսնում ես՝ «նա ով է, որ ես նրան մեկնաբանեմ» փողոցային ոճը, չեմ կարող անտարբեր լինել: Եթե դուք ցույց կտաք մի բառ, մի տող, որտեղ ես Լևոն Տեր-Պետրոսյանին վիրավորել եմ, ապա ես հրապարակավ ներողություն կխնդրեմ: Չկա և չի եղել այդպիսի բան: Անձնական վիրավորնանքներն ու հայհոյախառն ոճը իմը և իմ ընկերներինը չէ:

Մենք մեր կարծիքներում ոչ մի ածական չենք դնում, ոչ մի հեգնանք ու ցինիզմ չենք դնում: Փորփրեք էլ, չեք գտնի: Լրագրողն ինձ հարցրել է, թե ինչու է Լևոն Տեր-Պետրոսյանը լռություն պահպանում նախագահական ընտրությունների կապակցությամբ: Պատասխանել եմ՝ հեշտ չէ, դժվարին վիճակ է առաջնորդների համար: Մինչ այժմ կար մեկ կուսակցություն, ում օգտին աշխատում էր տեսակետ չհայտնելը: Դա ԲՀԿ-ն էր, քանի որ անորոշությունը աշխատում է նրա օգտին: Մնացյալ քաղաքական ուժերը ստիպված են ավելի արագ հայտարարել իրենց որոշման մասին, քանի որ անբնական է քեզ առանցքային ուժ կամ դերակատար համարես (խոսքս հավասարապես վերաբերել է ՀԱԿ-ին, ՀՅԴ-ին ու Ժառանգությանը), բայց որոշում չունենաս: Եվ ավարտել եմ, որ նման իրավիճակում Լևոն Տեր-Պետրոսյանն էլ ծանրութեթև է անում իր առաջադրվել-չառաջադրվելը, դրա օգուտներն ու վնասները: Օգուտ-վնասին վերաբերող հարցին էլ պատասխանել եմ, որ իմ կարծիքով անձնապես նա ավելի շատ կտուժի, քան կշահի: Ինչու եք սա մեկնաբանում, թե ես դեմ եմ Լևոն Տեր-Պետրոսյանի առաջադրմանը: Նա երբեք իմ կարծիքը չի հարցրել կամ լսել առաջադրվելիս, առավել ևս հիմա չի հարցնելու: Ձեր եզրակացությունները առնվազն պետք է ադեկտվատ լինեն, մինչդեռ իմ խոսքերը որակում եք ոչ միայն վիրավորանք, այլև անգամ ներկայացնում, թե, հայ, հայ, արգելում եմ Տեր-Պետրոսյանին առաջադրվել: Եթե դուք իմ խոսքերում վիրավորանք տեսնեք, ասացե՛ք, և ես ներողություն կխնդրեմ: Իսկ եթե խնդիր ունեք ազատ կարծիքի հետ, ապա այդ դեպքում ես խնդիր ունեմ Ձեր հետ:

Նույն բաները ինչ գրում եմ, վերաբերում է Արմեն Մարտիրոսյանի կարծիքին: Նա նույնպես վիրավորանք չի արտահայտել, այլ կարծիք: Եվ եթե բացատրեք, թե այս ամենի հետ ինչ կապ ունի Րաֆֆի Հովհաննիսյանը, ապա ես կշարունակեմ: Բացարձակ անհարիր վկայակոչումներ եք արել: Րաֆֆի Հովհաննիսյանի հետ աշխատում և շարունակում են աշխատել այն մարդիկ, ովքեր խնդիր չունեն նրա կառավարման եղանակի հետ: Ովքեր ունեն, ունեցել են, սիրել կամ սիրում են շեֆերի սենյակ մտնել-դուրս գալը, բամբասելը, ոտի տակ փորելը, նրանք բնականաբար այդ հնարավորությունից զրկված են եղել և հեռացել են: Ովքեր այդպիսի խնդիր չունեն, մնացել են: Ի՞նչ կապ ունի այս ամենը իմ գրառման հետ: Ի՞նչու եք փորձում ՀԱԿ և Ժառանգության առաջնորդներին խառնել այս ամենին:

Ինչ կապ ունեն նրանք Հրանտ Բագրատյանի «կարծիքի» հետ: Ոչ մի: Հետևաբար, կոչ կանեմ միջկուսակցական կռվի չվերածել այս ամենը: Հրանտ Բագրատյանն իմ հասցեին է բան ասել, ես էլ պատասխանել եմ: Մի՛ փորձեք ուրիշներին ներքաշել դրանում»։