«Ժողովուրդ». Վարդենիսի «Նյարդա– հոգեբանական տուն-ինտերնատ» ՊՈԱԿ-ի տնօրենն այժմ ազատության մեջ է

Հոկտեմբերի 3-ին աղմուկ-աղաղակով ձերբակալված Վարդենիսի «Նյարդա– հոգեբանական տուն-ինտերնատ» ՊՈԱԿ-ի տնօրեն Նվեր Հովհաննիսյանն այժմ ազատության մեջ է։

Ըստ «Ժողովուրդ»–ի տեղեկությունների՝ նրա մորեղբոր որդին՝ ՀՀԿ կազմակերպչական գծով փոխնախագահ Ռուբեն Թադևոսյանն է միջնորդել, որ Հովհաննիսյանն ազատ արձակվի։

Հիշեցնենք, որ տնօրենը մեղադրվում էր տուն-ինտերնատին հատկացված 3100 լիտր բենզինի յուրացման և թրաֆիքինգի մեջ։ Նա աշխատանքային թերապիայի անվան տակ 2012թ. մայիսի 16-ից տուն-ինտերնատի խնամքի տակ գտնվող, ծանր հիվանդությամբ տառապող 4 անձանց մինչև 2012թ. սեպտեմբերի 18-ը շահագործել էր։

Այժմ Հովհաննիսյանի հարազատները Վարդենիսում տեղեկություններ են տարածում, թե Նվերն այդ ամենի հետ ընդհանրապես կապ չի ունեցել և շուտով՝ դեկտեմբերի 7-ից, վերականգնելու է իր աշխատանքը։

Թերթը հավելում է նաև, որ ձերբակալվելուց հետո Հովհաննիսյանը սրտի հետ կապված խնդիրներով ոստիկանությունից տեղափոխվեց հիվանդանոց, որտեղ էլ նրան ստենդավորել և տուն են ուղարկել։