Բաշար Ասադ. Էրդողանը մերօրյա սուլթան է

Ռուսական անգլալեզու Russia Today հեռուստաալիքին տված հարցազրույցում Սիրիայի նախագահը նշել է. «Էրդողանին թվում է, թե ինքը սուլթան է»: Ասադի հիմնավորմամբ՝ Էրդողանին թվում է, որ եթե «Մահմեդական եղբայրություն» կազմակերպության հետևորդները հաղթանակի հասնեն ողջ տարածաշրջանում, մասնավորաբար՝ Սիրիայում, դա կերաշխավորի իր քաղաքական ապագան: Կարծում եմ նաև, որ Էրդողանին անձնապես թվում է՝ օսմանյան նոր սուլթան է և ի վիճակի է կառավարել տարածաշրջանն այնպես, ինչպես Օսմանյան կայսրության օրոք էր, միայն՝ իսլամական շղարշի ներքո:

Ըստ Սիրիայի նախագահի՝ այդ հիմնական պատճառներն են, որ ստիպեցին Էրդողանին «զրո խնդիրներ հարևանների հետ» քաղաքականությունից ի վերջո անցում կատարել դեպի «զրո բարեկամի քաղաքականության»: Վերջինիս պնդմամբ, այնուամենայնիվ, պատերազմը Թուրքիայի և Սիրիայի միջև անհավանական է:

Ըստ Ասադի՝ «Պատերազմը հանրային աջակցություն է պահանջում, իսկ Թուրքիայի ժողովրդի մեծամասնությունը պատերազմ չի ցանկանում: Երկրորդ պատճաոը, որ պատերազմը քիչ հավանական է դարձնում, հետևյալն է՝ խնդիրները ծագել են մեր պաշտոնյաների և թուրք պաշտոնյաների միջև՝ վերջիններիս որդեգրած քաղաքականության պատճառով: Ժողովուրդների միջև որևէ խնդիր չկա: Սա է պատճառը, որ ես հորիզոնում թուրք-սիրիական պատերազմ չեմ տեսնում»,-նշել է Սիրիայի նախագահը:

Անդրադառնալով Սիրիայի ներքաղաքական իրավիճակին՝ Ասադը նշել է, որ որևէ խնդիր չունի սիրիացի ժողովրդի հետ: Իր կառավարմանը դեմ է ԱՄՆ-ն, Արևմուտքը, արաբական երկրների մի մասը, Թուրքիան նույնպես դիմակայում է, սակայն նման իրավիճակում իր ժողովուրդը իր կողքին է, որն էլ վերջինիս պատասխանատու է դարձնում պայքարել իր ժողովրդի հետ մեկտեղ:

Սիրիայի նախագահը հավելել է, որ եթե ապստամբներին արտերկրից եկող օգնությունը դադարի, ապա կառավարական բանակից ընդամենը մի քանի շաբաթ կպահանջվի երկրում կարգուկանոն հաստատելու համար:

Նրա համոզմամբ՝ արևմտյան ինտերվենցիան երկրում քիչ հավանական է:

Հարցազրույցում տրված այն հարցին, թե ինչ տեղի կունենա, եթե սիրիական իշխանություններն ի վերջո պարտվեն, այդ դեպքում, ըստ Բաշար Ասադի, «Ալ-Ղաիդա»-ն կանի ամեն ինչ, որ Սիրիան վերածի իսլամական էմիրաթի: