Անահիտ Բախշյանը հաղորդում է հանցագործության մասին, ոստիկանությունը լռում է

Որոշ ժամանակ առաջ Լուրեր.com-ը գրել էր, որ մեր աղբյուրների փոխանցմամբ՝ Երևանի թիվ 27 դպրոցում կրճատված 4 ուսուցիչներից Հայկ Սիմոնյանը դպրոցում աշխատել է միայն մի քանի ամիս, իսկ վերջինիս կրճատման հրամանը տրվել է մի քանի ամիս անց։

Լուրեր.com-ը հարց էր բարձրացրել, թե այդ դեպքում մի քանի ամիս շարունակ ինչպես է ստացվել, որ փաստացի չաշխատող ուսուցչի ազատումն աշխատանքից իրավաբանորեն ձևակերպվում է մոտ մեկ տարի անց։ Ոչ մեկի համար թերևս գաղտնիք չէ, որ եթե աշխատանքային պայմանագիրը լուծված չէ, ապա անձը համարվում է աշխատող, հետևաբար և վարձատրվում է։ Այս դեպքում առաջ է գալիս տրամաբանական մեկ այլ հարց՝ ո՞վ է ստացել փաստացի չաշխատող ուսուցչի աշխատավարձը։

Լուրեր.com-ը զրուցել էր նաև ՀՀ կրթության և գիտության նախարարության Կրթության ազգային ինստիտուտի փոխտնօրեն Անահիտ Բախշյանի հետ՝ ճշտելու գործի մանրամասները։

Բախշյանն ասաց, որ Հայկ Սիմոնյանի մասին դպրոցում աշակերտ, ուսուցիչ ասում են, որ նա, ըստ պայմանագրի, դեկտեմբերի 1-ից աշխատել է որպես մաթեմատիկայի ուսուցիչ։

Ընդ որում, Հայկ Սիմոնյանին տնօրենն աշխատանքի է ընդունել երեք ամիս ժամկետով, հետո այդ երեքը դարձրել են վեց ամիս՝ դեկտեմբերի մեկից մինչև հունիս։

«Երեխաները պնդում են, որ այս մարդն աշխատել է մինչև հունվարի կեսերը։ Հետո այլևս դպրոցում չեն տեսել, բայց ինքն օգոստոս ամսվա ցուցակում ստացել է մոտավորապես 140.000 դրամ աշխատավարձ։ Հիմա այս խնդիրը պետք է պարզի պատկան մարմինը։ Ես ահազանգում եմ, ես բարձրաձայնում եմ, ես հաղորդում եմ տալիս, մնացածը թող անեն պատկան մարմինները»,–ասել էր Բախշյանը։

Բախշյանը նշել էր նաև, որ այդ ցուցակում կան մարդիկ, ում անգամ իրենք չեն էլ ճանաչում։

«Այս ամենի իրավաբանական տերմինը հաղորդում է հանցագործության մասին։ Պատկան մարմինները թող պարզեն՝ ինչ է կատարվել»,- ասաց Բախշյանը։ 

Լրագրողի այն հարցին՝ պատկան մարմիններն այս գործով արդեն զբաղվում են, թե՝ ոչ, Բախշյանն ասել էր՝ դեռ ոչ, և հույս հայտնել, որ պատկան մարմիններն այս հաղորդումից հետո կզբաղվեն. «Այս փասթաթղթերը ես սիրով կներկայացնեմ պատկան մարմիններին, եթե ինձնից պահանջեն»։

Լուրեր.com-ը զրուցեց ՀՀ ոստիկանության մամուլի բաժնի աշխատակից Արմեն Մալխասյանի հետ, ով մի քանի օր շարունակ փորձում էր ճշտել՝ Բախշյանի հայտարարության հիման վրա գործ հարուցվել է, թե` ոչ։

Մալխասյանն այդպես էլ մի քանի օր շարունակ չկարողացավ ճշտել՝ հարուցված գործ կա, թե՝ ոչ։

«Դեռ ճշտում ենք»,-ասաց Մալխասյանը։