Ադրբեջանը «մեկնաբանել է» Wall Street Journal-ին տված ՀՀ նախագահի հարցազրույցը

Այն, որ ադրբեջանական կողմը լծված է միայն իրականացնելու մեկ մշակված մարտավարություն, այն է՝ ձեռքը պահել ՀՀ-ի կողմից հնչեցվող հայտարարությունների պուլսին՝ փորձելով այն առանց լուրջ փաստերի ու հիմնավորման հերքել, ակնհայտ դարձավ արդեն մեկ օր առաջ Ադրբեջանի մի պաշտոնյայի հերթական զառանցանքներից: Ադրբեջանի նախագահի աշխատակազմի հասարակական-քաղաքական հարցերի բաժնի ղեկավար Ալի Հասանովը լրագրողների հետ զրույցում մեկնաբանել է Հայաստանի նախագահ Սերժ Սարգսյանի՝ Wall Street Journal–ին տված հարցազրույցը, որտեղ հայկական պետության ղեկավարը, ըստ նրա, ասել է, թե «Ադրբեջանը պատրաստվում է Հայաստանի հետ պատերազմի»:

Հարկ է նշել, որ ՀՀ նախագահը ս.թ. նոյեմբերի 8-ին հարցազրույց էր տվել Wall Street Journal պարբերականի լրագրող Ջո Փարքինսոնին, ով հանդիսանում է վերոնշյալ պարբերականի ստամբուլյան մասնաճյուղի ղեկավարը: Լրագրողի այն հարցերին, թե առաջիկայում ինչպես կարող են զարգանալ հարաբերությունները ՀՀ-ի և Ադրբեջանի միջև և որն է հակամարտության լուծման բանալին, Սերժ Սարգսյանը նշել է, որ վերջին շրջանում իրավիճակն իրոք առավել քան լարված է: Ըստ ՀՀ նախագահի՝ հայկական կողմը խիստ մտահոգված է Ադրբեջանի՝ ԼՂ տարածքը զինված հակամարտության մեջ ներգրավելու ցանկությամբ։ Մանրամասնելով Ադրբեջանի կողմից ռազմական լուծման տարբերակը նախընտրելու և այն արտաքին քաղաքականության մեջ շրջանառելու նպատակները՝ երկրի ղեկավարն ընդգծել է, որ իրավիճակի վատթարացման դեպքում հայկական զինված ուժերը կարող են «անհամաչափ» ուժեղ պատասխան տալ։ Ընդգծելով պաշտոնական Բաքվի ռազմական հռետորաբանությունը՝ Սերժ Սարգսյանը նշել է, որ Ադրբեջանը, ցավոք, հարմար առիթ է փնտրում հակամարտության վերսկսման համար։ Նշվել է, որ նման քաղաքական սխալը կարող է վնասել ԼՂ-ի և Հայաստանի ժողովրդին, սակայն կորուստների և վնասի տեսակետից անմասն չի մնալու նաև Ադրբեջանը, որի կրած կորուստները, հնարավոր է, անհամեմատ ավելին լինեն:

Ադրբեջանի նախագահի աշխատակազմի ներկայացուցիչը փորձել է «վերհանել» Սերժ Սարգսյանի հայտարարության պատճառները: Նա նշել է. «Առաջին պատճառն այն է, որ Սերժ Սարգսյանը նման հայտարարություններով վախի մթնոլորտ է ստեղծում հայ բնակչության շրջանում և դրանով էլ ձգտում է նախագահական ընտրություններից առաջ իր դիրքերի ամրապնդմանը: Երկրորդ պատճառն այն է, որ նա ուզում է քողարկել հայկական իշխանությունների կողմից անցկացվող քաղաքականության ռազմամոլ բնույթը: Աշխարհում բոլորին հայտնի է, որ մեր տարածաշրջանում ռազմամոլության հիմնական օջախը հանդիսանում է Հայաստանը:

Հենց Հայաստանը և նրա կողմից «օկուպացված» Ադրբեջանի տարածքներն են այսօր վերածվել ռազմամոլության օջախի: Հենց Երևանն է իր ռազմական ուժերն ու տեխնիկան կենտրոնացրել այդ տարածքներում և հովանավորում է թմրաբիզնեսի ու զենքի անօրինական տեղափոխմանը»,- ասել է Ա. Հասանովը:

Հ.Գ. Հետևելով ադրբեջանական կողմի նմանատիպ հայտարարություններին՝ կարելի է ասել, որ իրոք այս երկրի վարչակարգը փորձում է ինքնահաստատվել հաղթանակած երկրի հաշվին: Հոգեվերլուծության տեսակետից դա հատուկ է պարտվող կողմին, որը հետագայում լուրջ շեղումներ է ստանում զանգվածների ենթագիտակցության մեջ:

Այնպես որ, կարելի է ուղղակի հետևել վերջիններիս անարդյունք հռետորաբանություններին՝ հասկանալու համար, թե ինչքան խորը կարող է զարգանալ նշյալ ենթագիտակցական շեղումը…

Լյուդմիլա Սարգսյան