Ամոթ բան եմ արել, խոստովանում եմ

Շուրջ մեկ տարի էր՝ հանդիպում էինք Դինի հետ (անունները փոխված են), սակայն ներքուստ զգում էի, որ ինչ-որ բան այն չէ: Նրա հեռախոսը սկսել էր հաճախակի անջատվել, նա սկսել էր իմ ներկայությամբ չպատասխանել հեռախոսազանգերին, իսկ երբ հարցնում էի՝ ով է զանգահարում, զայրանում էր և վիրավորվում: Այո՛, այդ ամենն ինչ-որ բան նշանակում էր: Փոխարենը՝ նա շարունակ խոսում էր մեր ծանոթության մեկամյակը նշելու մասին, իսկ ինձ մնում էր միայն ձևացնել, թե հավատում եմ նրա ստերին:

Մի օր պատահմամբ նրա ընկերոջ Facebook-ի էջի պատին լուսանկարներ տեսա. այդ լուսանկարներում Դինն էլ կար: Դրանք արվել էին այն օրը, երբ նա ինձ ասել էր, որ տղաներով գնում են ժամանակ անցկացնելու: Մինչդեռ լուսանկարներից մեկում նա մի սևահեր կնոջ հետ էր: Երբ բացատրություն պահանջեցի, նա սկսեց արդարանալ, թե այդ կինն իրենց հետ չէր. նա պարզապես բարում էր և լուսանկարվել է իր հետ:

Ես հասկացա, որ եկել է ճշմարտությունը պարզելու ժամը: Ես չէի ցանկանում ծաղրածուի կարգավիճակում լինել և պարտադրված նշել մեր ծանոթության տարեդարձն այն դեպքում, երբ իրականում պետք է Դինի երեսին շպրտեի ողջ ճշմարտությունն ու հեռանայի նրանից: Սովորաբար չեմ սիրում ներխուժել ուրիշների անձնական տարածք, բայց այլ տարբերակ չունեի:

Երեկոյան ժամերին Դինի բնակարանում հեռուստացույց դիտելը մեր ամենօրյա արարողակարգերից էր դարձել: Եվ այսպես, մի օր, երբ դիտում էինք մեր սիրելի հեռուստասերիալը, Դինը մոտեցավ համակարգչին՝ բացելու Facebook-ի իր էջը: Ես անաղմուկ հետևեցի նրան և աննկատ ֆիքսեցի նրա գաղտնաբառը: Հաջորդ օրը արդեն իմ բնակարանում հավաքեցի ողջ համարձակությունս ու բացեցի նրա էջը...
Ստուգեցի նրա նամակները... Ես ճիշտ էի: Նա հանդիպում էր Թրեյսի անունով մի կնոջ հետ, և դա նույն լուսանկարի կինն էր: Իմ կասկածները հաստատվեցին: Իսկ Թրեյսիի էջում ինձ իսկական անակնկալ էր սպասում. նրանց երկուսի լուսանկարները՝ գրկախառնված: Ես գործ ունեի ստախոս ու սրիկա տղամարդու հետ...

Ներսումս փոթորիկ էր, սակայն ես որոշում կայացրեցի. հարկավոր է հանդարտվել ու վրեժ լուծել: Դինն ինձ ծանոթացրել էր իր մտերիմ ընկերոջ՝ Պատրիկի հետ: Մեր միջև փոխադարձ համակրանք կար, զրուցելու ընդհանուր թեմաներ: Մտքումս անմիջապես մի գաղափար հղացավ...

Հաջորդ օրը, թեև նշելու էինք մեր մեկ տարին, հաղորդագրություն ուղարկեցի Դինին և զգուշացրեցի, որ քաղաքում չեմ լինելու, քանի որ պետք է լինեմ ընկերներիցս մեկի կողքին, ով իմ կարիքն ունի: Ասացի, որ կզանգեմ: Փոխարենը՝ ճամպրուկի մեջ մի քանի հագուստ խցկեցի և հաղորդագրություն ուղարկեցի Պատրիկին. «Գալիս եմ... ինձ հետ վերցրել եմ ժանեկավոր ներքնազգեստս: Իսկ դու լավ կլիներ մի քանի պահպանակ ունենայիր գրպանումդ»: Երբ հանդիպեցինք, պարզվեց, որ խաղի կանոնները հստակ են երկուսիս համար էլ. Պատրիկն ինձ չափում էր ոտքից գլուխ՝ կրքոտ ու սեքսուալ հայացքով: Կարծում եմ՝ գուշակում եք, ինչ տեղի ունեցավ հետագայում: Ես Պատրիկին ոչինչ չասացի Դինի դավաճանության մասին: Մտածեցի, որ սեքսն ավելի արգելված կլինի, եթե Պատրիկը չիմանա, որ որոշել եմ վրեժխնդիր լինել Դինից: Եվ ես իրավացի էի:

Հաջորդ առավոտյան հեռախոսս զնգաց: Դինն էր՝ ձայնային հաղորդագրությամբ. «Կարոտում եմ քեզ: Շնորհավոր մեր առաջին տարին»: Աչքերս հառելով կողքիս պառկած Պատրիկի մերկ մարմնին՝ ասացի. «Քեզ էլ եմ շնորհավորում»:

Տուն վերադառնալուն պես զանգահարեցի Դինին ու ասացի, որ մեր միջև ամեն ինչ վերջացած է, և որ ես գիտեմ իր դավաճանության մասին: Հետո Facebook-ում տեղադրեցի իմ ու Պատրիկի մի քանի «հանցավոր» լուսանկար՝ հատուկ Դինի համար: Մինչև հիմա ժպտում եմ, երբ հիշում եմ այդ կրքոտ գիշերը, և ինձ հատկապես դուր է գալիս այն միտքը, որ ինձ վրեժխնդիր լինել օգնեց Դինի, այսպես կոչված, «լավագույն» ընկերը:

cosmo.am