Մահվան ելքով վրաերթ կատարած վարորդն ինքնակամ ներկայացել է ոստիկանություն

Ոստիկանության Արմավիրի մարզային վարչության և Ոստիկանության Մեծամորի բաժնի աշխատակիցների բացատրական աշխատանքի արդյունքում երեկ՝ նոյեմբերի 10-ին, մեղայականով ինքնակամ ոստիկանություն է ներկայացել Արմավիրի մարզի Ակնալիճ գյուղի բնակիչ 21-ամյա Վարդան Միսակյանը:

Ինչպես հայտնում է shamshyan.com–ը, վերջինս ոստիկաններին հայտնել է, որ նույն օրը, ժամը 19:00-ի սահմաններում, Երևան-Արմավիր ավտոճանապարհի 32-րդ կմ հատվածում, Մեծամոր քաղաքի տարածքում վրաերթի է ենթարկել մի տղամարդու և նրան թողնելով անօգնական՝ հեռացել դեպքի վայրից: Տղամարդը տեղում մահացել էր:

Դեպքի վայրում աշխատել էին Ճանապարհային ոստիկանության 2-րդ սպայական գումարտակի 1-ին վաշտի 1-ին դասակի աշխատակիցները՝ վաշտի հրամանատար Տիգրան Գրիգորյանի, դասակի հրամանատար Գրիգոր Գրիգորյանի գլխավորությամբ: Տեղում էին նաև Ոստիկանության Մեծամորի բաժնի օպերատիվ խումբը՝ Մեծամորի ոստիկանապետ Արմեն Գասպարյանի գլխավորությամբ:

Ֆոտոլրագրողը հայտնում է, որ Վ. Միսակյանը վրաերթը կատարել է իր կողմից վարած «Վազ 21213» մակնիշի 33 PU 425 համարանիշի ավտոմեքենայով:

Ավտոմեքենան տեղափոխվել է Ոստիկանության Մեծամորի բաժնի հատուկ պահպանման տարածք: