ВВС-ի գլխավոր տնօրենը հրաժարական է տվել՝ ապատեղեկատվության համար

ВВС-ի գլխավոր տնօրեն Ջորջ Էնթվիսթլը ստիպված է եղել լքել իր պաշտոնն այն բանից հետո, երբ հեռուստաալիքը մեղադրել է բրիտանացի քաղաքական գործչին մանկապղծության մեջ, հաղորդում են միջազգային լրատվամիջոցները:

Նոյեմբերի 2-ին ВВС-ի լրատվական ծրագրում նյութ էր հայտնվել Ուելսի հյուսիսում տեղակայված մանկատան մասին, որը գործել է 1971-1980թթ-ին: Մանկատան նախկին սաներից մեկը պատմել է, որ երեխաները դուրս են բերվել մերձակա հյուրանոցներ՝ մարմնավաճառությամբ զբաղվելու համար: Նա հավելել է, որ հաճախորդներից մեկը ժամանակի բարձրաստիճան քաղաքական գործիչներից մեկն էր՝ Մարգարետ Թետչերի մերձավորներից:

Այս սկանդալի շրջանակներում հայտնի է դարձել նաև լորդ Ալիսթեր Մակէլայնի անունը, ով Թետչերի խորհրդականն ու Պահպանողական կուսակցության գանձապահն էր: Լորդը հայտարարել է, որ իրեն առաջադրված մեղադրանքը ոչ հավաստի է, ինչի համար հեռուստաալիքը ներողություն է խնդրել:

Էնթվիսթլի Newsnight հաղորդման ընթացքում, հնչեցրած տեղեկատվությունը լուրջ առիթ էր տվել, որպեսզի վերջինս արդեն երեկոյան ուղիղ եթերով հայտարարեր իր պաշտոնը թողնելու որոշման մասին: