Հաիթիում 17 մարդ ջրհեղեղի զոհ է դարձել

Հաիթիի հյուսիսում 17 մարդ է զոհվել տրոպիկական անձրևների արդյունքում առաջացած հեղեղների պատճառով:

1.5 հազարից ավել մարդ ստիպված է եղել լքել իրենց բնակավայրերն այն բանից հետո, երբ գետերը դուրս են եկել ափերից. փոխանցում է ИТАР-ТАСС-ը՝ հղում կատարելով կարիբյան պետության իշխանությանը:

Տարերքի մոլեգնումը հատկապես բարդացնում է խոլերայի համաճարակի դեմ պայքարը, որն արդեն 2 տարի է, շարունակվում է Հաիթիում: Վերջին տվյալների համաձայն՝ համաճարակը խլել է 7626 մարդու կյանք, իսկ խոլերայով վարակվածների թիվը հասել է 600 հազարի:
Այն բանից հետո, երբ կղզու տարածքում վրա էր հասել «Սենդի» փոթորիկը, հիվանդների թիվը կտրուկ աճել էր: Հատկապես ծանր է իրավիճակը երկրի արևմտյան և հյուսիսարևմտյան հատվածներում:

Բացի այդ՝ տարերքն ավերել է խոլերայի դեմ պայքարի համար նախատեսված հատուկ բժշկական 20 կենտրոն:

Հաիթիում գործող ՄԱԿ-ի հումանիտար ծառայությունների տվյալներով՝ Սենդի փոթորկի արդյունքում 2 մլն տեղաբնիկ է հայտնվել ծայրահեղ ծանր վիճակում: Փոթորիկն ավերել է նաև գյուղատնտեսական կուլտուրաների մեկ քառորդը:

ԵՄ-ն որոշում է ընդունել Հաիթիի իշխանություններին ուղարկել 6 մլն եվրո դրամական օգնութուն, ևս 6 մլն դոլար է հատկացրել ԱՄՆ-ը: