ԵԱՀԿ-ի ներկայացուցիչը Բաքվում այցելել է ձերբակալված լրագրողներին

ԵԱՀԿ-ի www.osce.org պաշտոնական կայք-էջի տեղեկատվության համաձայն՝ նշյալ կառույցի մամուլի ազատության հարցերով ներկայացուցիչ Դունյա Միյատովիչը ս.թ. նոյեմբերի 9-ին պաշտոնական այց է կատարել Բաքու, որտեղ տեղի իշխանությունների հետ քննարկել է մամուլի ազատության դերն Ադրբեջանում: Ներկայացուցիչը երկրի ներքին գործերի նախարար Ուսուբովի թույլտվությամբ այցելել է իշխանությունների կողմից կալանավորված լրագրողներին:

Միյատովիչը լրագրողների հետ ունեցած ճեպազրույցում նշել է, որ ԵԱՀԿ գրասենյակի և Ադրբեջանի իշխանությունների միջև հաստատվել է փոխվստահության մթնոլորտ, որի արդյունքում հնարավոր է դարձել բաց և թափանցիկ դիտարկում իրականացնել Ադրբեջանի բանտերում կալանավորված լրագրողների հետ: Վերջինս նշել է, որ լիահույս է, որ այցից հետո, համաձայն ձեռք բերված պայմանավորվածությունների, հնարավոր է, նշյալ լրագրողներն ու բլոգերները հայտնվեն ազատության մեջ:

Ըստ ԵԱՀԿ ներկայացուցչի՝ վերջինս Ադրբեջանի իշխանություններին իր մտահոգությունն է հայտնել Ադրբեջանում անկախ լրագրողների նկատմամբ ճնշումներ իրականացնելու, խոսքի ազատությունը սահմանափակելու հիմնահարցերի շուրջ: Քննարկումների ընթացքում նշվել է հարձակման ենթարկված Իրաք Աբբասովիովի, ճնշման ենթարկված Խաջիջա Իսմայլովի և ադրբեջանական ընդդիմադիր Äzadliq թերթի ճակատագրի մասին: Վերջինս փոխանցել է, որ Ադրբեջանի իշխանությունների հետ փոխհամաձայնության է հասել, ըստ որի, անհրաժեշտություն է, որպեսզի երկրի կառավարությունն ապահով և ազատ միջավայր ստեղծի լրագրողների ազատ տեղաշարժի, խոսքի ազատության արտահայտման համար, որը հնարավորություն կտա գործող լրագրողներին իրենց պարտականություններն իրականացնել առանց վախի ու ճնշումների:

Համաձայն ԵԱՀԿ ներկայացուցչի` վերջինս հետամուտ է, որ այսուհետ Ադրբեջանի իշխանությունները դատապարտեն այն անձանց կամ ուժերին, ովքեր կփորձեն հետապնդել, ճնշել, ահաբեկել կամ հարձակում իրականացնել մեդիայի ներկայացուցիչների նկատմամբ, քանի որ նշյալ փաստերը շատ արագ ուսումնասիրվում են իրենց կառույցի կողմից: Վերջինս առաջարկել է Ադրբեջանի իշխանություններին ԵԱՀԿ գրասենյակի հետ համատեղ, մշակել լրագրողների ազատ գործելու օրենսդրական նոր դաշտ: Նշվել է նաև երկրում տպագիր, առցանց և համացանցային մամուլի ազատության մասին, որի երաշխավորն Ադրբեջանի իշխանություններն են:

Այցի շրջանակներում Միյատովիչը պաշտոնական հանդիպում է ունեցել երկրի ԱԳ նախարար Էլմար Մամեդյարովի, ՆԳ նախարար Ուսուբովի, նախագահի աշխատակազմի հասարակա-քաղաքական հարցերով վարչության պետ Ալի Հասանովի, այդ թվում՝ երկրի նախագահի միջազգային հարաբերությունների բաժնի ղեկավար Ն.Մամեդովի հետ:

Հարկ է նշել, որ Միյատովիչին երկրի իշխանությունների կողմից կալանավորված լրագրողներին այցելելու լիակատար իրավունք է տրվել, որի ընթացքում վերջինս տեսակցել է Ադրբեջանի բանտերում դատապարտված Khural թերթի խմբագիր Ավազ Զեյնալիի, անկախ լրագրող Ֆարամազ Նովրուզօղլու, Khayal TV-ի գործադիր տնօրեն Վուգար Գոնագովի և թալիշերենով լույս տեսնող Tolishi Sado թերթի գլխավոր խմբագիր Հիլալ Մամեդովի հետ:

Հ.Գ. Մնում է միայն անկնկալել, որ իրեն ժողովրդավար համարող Ադրբեջանն իրականում հաշվետու կլինի իր սխալներն ուղղելու գործընթացում, հակառակ դեպքում վերը նշված միջազգային կառույցին հայտնի նշյալ փաստերն այլևս իրականություն կլինեն, միջազգային հանրությանը ներկայացնելու ԻՐԱԿԱՆ ԱԴՐԲԵՋԱՆԻ ԴԵՄՔԸ:

Լյուդմիլա Սարգսյան