Ի՞նչ պայմանով Րաֆֆի Հովհաննիսյանը կընդունի էպոսագետի դրամական օգնությունը

Այսօր լրագրողների հետ հանդիպման ժամանակ նախագահի թեկնածու Վարդան Սեդրակյանը հայտարարել է, որ քանի որ անցած շաբաթ Րաֆֆի Հովհաննիսյանն ասել է, որ պատրաստվում է առաջադրել իր թեկնածությունը նախագահական ընտրություններում և հայտարարել է, որ ընտրագրավը կկարողանա վճարել հասարակության հանգանակության հաշվին, ինքը պատրաստ է որպես հայ մարդ, նրա հայրենակից արձագանքել նրա կոչին։

«Այսօր ցանկանում եմ հայտարարել, որ պատրաստ եմ վճարել նրա ընտրագրավը»,-ասել է Սեդրակյանը։

Լուրեր.com-ը զրուցեց «Ժառանգություն» կուսակցության խոսնակ Հովսեփ Խուրշուդյանի հետ, ով նախ նշեց, որ Րաֆֆի Հովհաննիսյանը որևէ տեղ չի ասել, որ ընտրագրավի գումարը չկա և այն ինչ-որ տեղից հավաքելու խնդիր կա։  

«Հավանաբար դա մամուլի կողմից Հովհաննիսյանի իրական խոսքերի աղավաղման հետևանքն է, թյուրըմբռնում՝ Վարդան Սեդրակյանի կողմից»,- ասաց Խուրշուդյանը։

Խուրշուդյանը նշեց նաև, որ եթե Սեդրակյանը պատրաստ է մրցակցին նյութապես աջակցել, ապա ենթադրելի է, որ կարելի է մտածել, որ ինքը հրաժարվում է նախագահական ընտրարշավից և որոշել է դառնալ Րաֆֆի Հովհաննիսյանի ընտրողը։

«Ընդհանրապես մեր երկրում ընտրությունների ֆինանսավորումն իրականացվում է դրամական աջակցությունների հիման վրա։ Այլ ֆինանսավորման աղբյուր որևէ թեկնածու չունի։ Նրանց ֆինանսավորում են քաղաքացիները և  ձեռնարկությունները։ Հիմա եթե պարոն Սեդրակյանը որոշել է դուրս գալ ընտրապայքարից և դառնալ Րաֆֆի Հովհաննիսյանի ընտրողը և իր ձայնը տալ Րաֆֆի Հովհաննիսյանին, ապա խնդիր չկա, մենք սիրով կընդունենք ցանկացած հանգանակություն ընտրարշավի, քարոզարշավի ավելի ծավալուն իրականացման համար, եթե իհարկե պարոն Սեդրակյանն իր խոսքի տերը լինի և հետո ետ չկանգնի իր խոստումից»,-ասաց Խուրշուդյանը։