Ինչպե՞ս եք ուզում շարունակել էս երկիրը, ասե՛ք, մենք էլ միանանք. Հրանտ Բագրատյան

Ազգային ժողովի այսօրվա նիստում կրկին քննարկման դրվեց «Նվազագույն ամսական աշխատավարձի մասին» ՀՀ օրենքում փոփոխություններ կատարելու մասին նախագիծը:

ՀԱԿ խմբակցության պատգամավոր Հրանտ Բագրատյանն իր ելույթի ժամանակ նշեց, որ այս որոշումից առաջ իրենք կառավարություն էին ներկայացրել նախագիծ նվազագույն աշխատավարձը 72 500 դրամ դարձնելու վերաբերյալ, և դրա ֆոնի վրա անմիջապես ընդունվեց այս որոշումը:

Բերելով աշխարհի մի քանի երկրներում միջին և նվազագույն աշխատավրձի չափի օրինակներ՝ Բագրատյանը նշեց, որ Հայաստանը միջին աշխատավարձի չափով եվրոպական զարգացած երկրներից հետ է մնում 10 անգամ, նվազագույն աշխատավարձից հետ է մնում 20 անգամ:

«Խնդիրը միայն այն չէ, որ մարդիկ աղքատ են, փողը տվեք մարդկանց։ Խնդիրն այն է, որ սխալ ստրուկտուրայով առաջ եք գնում: Մենք ասում ենք՝ այստեղ սխալ կա, եկեք շտկենք, և ընդ որում, սա փող չի պահանջում:

Կառավարությունն առանց խորանալու երևույթի մեջ, առանց խորանալու, որ նվազագույն աշխատավարձը չի կարող նվազագույն սպառոական զամբյուղից փոքր լինել մերժում է, պատճառաբանելով, որ փող չկա»- ասաց Բագրատյանը:

«Ինչո՞ւ եմ ես 72.5 հազար դրամ առաջարկել կառավարությանը: Կառավարությունն ասում է՝ իմ միջին աշխատավարձը 120.000 դրամ է, մյուս տարի սպասվում է 126-127 հազար դրամ: Ու հանկարծ դրանից հետո ստանում ենք մերժում, թե 360 մլրդ կպահանջվի, չպիտի պահանջվի, 50-55 մարդ է նվազագույնի չափ ստանում: Այստեղ, երբ կառավարությունն իր 35 հազար դրամն է ներկայացնում՝ փորձելով, այսպես ասած, առաջ անցնել մեր ասածից, մեզ հայտարարվել է հետևյալը, որ 470.000 աշխատողից 310.000-ը նվազագույնն են ստանում, այդպիսի բան լինել չի կարող, եթե միջինը 120.000 է: Սա Աղայանի հայտնի հեքիաթն է, էն որ թագավորն ասում է՝ ով այնպիսի սուտ ասի, որ ասեմ՝ սուտ է, թագավորության կեսը կտամ: Գալիս են, տարբեր ստեր են ասում, մեկն էլ ասում է՝ դու ինձ փող ես պարտք, ոսկի ես պարտք: Հիմա սա նույն բանն է: Եթե ես սխալ եմ եղել իմ 72.500 դրամով, ուրեմն միջին աշխատավարձի թիվը սխալ է, իսկ դուք զեկուցում եք, որ 120.000 դրամ միջին աշխատավարձ եք տալիս: Այս տարի սպասվում է, տարին կփակենք բյուջետային ոլորտը 112 հազար դրամ և ոչ բյուջետային ոլորտը՝ 145 հազար դրամ: Ընդամենը պահանջվում է 22 մլրդ դրամ այս վիճակը փոխելու համար: Իրենց արգումենտն այն է, որ մենք ունենք քաղծառայողի բազային ստավկա, չանեիք էդ բազային ստավկան: Էդ ամբողջ բարդագույն սխեման, որ ստեղծել եք, մաքսային ծառայություն, քաղաքացիկան ծառայություն, հարկային, սխալ է: Դե որ սխալ եք արել, փոխեք: Ո՞նց կարող է դուք ստեղծեք սիստեմ, երբ նվազագույն աշխատավարձը կազմում է միջին աշխատավարձի 25 տոկոսը: Դուք դատապարտում եք մարդկանց աղքատության և 2013-ի բյուջեն ընդունելուց հետո աղքատությունը 35.8 %-ից դառնում է 37%:

Մենք երկիրը էսօր քշում ենք դեպի սոցիալական կատակլիզմների: Այդ բացասական էներգիան դուրս է գալիս արտագաղթի մեխանիզմով, բայց դա իր սահմաններն ունի:  Իհարկե, այս միտքն առաջացել է, երբ մենք առաջարկեցինք 72.500 դրամ: Յոթ տոկոսով նվազագույն աշխատավարձ են բարձրացնում, երբ գները բարձրացել են 10.1 %-ով, միևնույն ժամանակ ֆինանսկաան ոլորտում աշխատավարձը կրկնապատկվել է: Ինչպե՞ս եք ուզում շարունակել էս երկիրը, ասե՛ք, մենք էլ միանանք օգնենք ձեզ: Սա անհեթեթ փոփոխություն է, կոչ եմ անում ԱԺ-ին դեմ քվերակել սրան: Էստեղ որևէ լուծում չկա, որևէ ինտելեկտ չի ներդրված, էսպես չի կարելի շարունակել: Գոնե փոխհատուցե՛ք այն, ինչ մարդիկ ունեին երկու տարի առաջ, գոնե բարձրացրե՛ք էնքան, ինչքան գներն են բարձրացել»,-ասաց Բագրատյանը: