Այսօր կհանդիպեն ՀԱԿ-ի և ԲՀԿ-ի ներկայացուցիչները

Այսօր հանդիպում է նախատեսված ԲՀԿ և ՀԱԿ անդամների միջև։

Ինչպես ավելի վաղ տեղեկացրել էր  Lurer.com-ը, այդ ձևաչափով հանդիպում արդեն տեղի է ունեցել նաև ԲՀԿ-ի և ՀՅԴ-ի միջև։

Նշենք նաև, որ նման հանդիպում նախատեսված է նաև «Ժառանգություն» կուսակցության անդամների հետ: 

Հանդիպումներ չեն կայանա ՀՀԿ-ի և ԲՀԿ-ի միջև, քանի որ ըստ Գալուստ Սահակյանի՝ ՀՀԿ-ն նման հարցադրումներին շատ վաղուց պատասխանել է, որովհետև տարիներ շարունակ նույն հարցադրումներով հանդես են եկել և՛ ԱԺՄ-ն, և´ ՀՅԴ-ն, և´ «Ժառանգությունը»։ «Այդ հարցերին մենք արդեն բոլոր արգումենտներով պատասխանել ենք, եթե նոր հիմնավորումներ լինեն, կմտածենք»,- Lurer.com-ի հետ զրույցում ասել էր Գալուստ Սահակյանը։

Հիշեցնենք, որ ԱԺ «Բարգավաճ Հայաստան» խմբակցության քարտուղար Նաիրա Զոհրաբյանը հանդես էր եկել հայտարարությամբ և ներկայացրել իր կուսակցության մոտեցումներն առաջիկա նախագահական ընտրությունների և երկրի կառավարման համակարգի վերաբերյալ։

Հայտարարությունում շեշտվում է կառավարման խորհրդարանական համակարգին անցում կատարելու անհրաժեշտությունը, և այդ կապակցությամբ ԱԺ-ում 100% համամասնական ընտրակարգին անցնելը։ Ըստ այդմ, ԲՀԿ-ն կսկսի խորհրդակցությունները քաղաքական ուժերի հետ։