ՀԱԿ ակտիվիստներին հեռացրել են նիստերի դահլիճից. Դատավորը փորձում է անցնել դատավճռի վերջին փուլին (թարմացված)

Այս պահին ՀՀ Վերաքննիչ դատարանում ընթանում է «Հայ ազգային կոնգրեսի» ակտիվիստների դատավարությունը: Դատավորն առանց հիմնավոր պատճառաբանությունների դահլիճից հեռացրել է Տիգրան Առաքելյանին, Սարգիս Գևորգյանին և Դավիթ Քիրամիջյանին։

Լուրեր.com-ը զրուցեց ՀԱԿ ակտիվիստտ Արեգ Գևորգյանի հետ, ով նշեց, որ դատավորը մերժել է փաստաբանների կողմից առաջարկված բոլոր միջնորդությունները։

«Դատավորը փորձում է անցնել դատավճռի վերջին փուլին։ Տիգրան Առաքելյանը, Սարգիս Գևորգյանը և Դավիթ Քիրամիջյանը հեռացվել են դատական նիստերի դահլիճից։ Փաստաբանի պահանջին, որ ժամանակ տրամադրվի նախապատրաստական ճառին պատրաստվելու համար, դատավորը մերժեց։ Ըստ էության, դատավորը չի ուզում դատական նիստը հետաձգել։ Երևում է՝ ցանկանում է շատ արագ դատական վճիռ հրապարակել։ Ամենայն հավանականությամբ, կկայացվի անփոփոխ դատական վճիռ, որովհետև ոչ մի միջնորդություն չի ընդունվել։

Այս պահին փաստաբանները՝ Վահե Գրիգորյանն ու Ստեփան Ոսկանյանը ևս հեռացել են նիստերի դահլիճից»,-ասաց Արեգ Գևորգյանը։

Քիչ առաջ Արեգ Գևորգյանը Լուրեր.com-ի հետ զրույցում նշեց, որ դատական նիստը հետաձգվեց։

«Դատական նիստը հետաձգվել է միայն այն պատճառով, որ դատավորն առանց որևէ դատավարական փուլ անցկացնելու վաղը միանգամից  կհրապարակի որոշում։ Այստեղ, ինչպես միշտ, միանշանակ խախտվեց կողմերի հավասարությունը»։

Հիշեցնենք, որ 2011-ի օգոստոսին Կարապի լճի մոտ տեղի ունեցած հայտնի միջադեպից հետո «Հայ ազգային կոնգրեսի» 4 երիտասարդ ակտիվիստներ՝ Տիգրան Առաքելյանը, Արտակ Կարապետյանը, Դավիթ Քիրամիջյանն ու Սարգիս Գևորգյանը դատապարտվել էին 2-6 տարվա ազատազրկման: Ակտիվիստները Վերաքննիչ քրեական դատարանում բողոքարկում են վճիռը: