ՀԱԿ-ի հետ անձերի վերաբերյալ քննարկումներ չեն եղել. Նաիրա Զոհրաբյան

Օրեր առաջ «Բարգավաճ Հայաստան» կուսակցությունը քաղաքական մի քանի խնդիրների շուրջ քաղաքական քննարկումներ սկսելու առաջարկով դիմել էր բոլոր կուսակցություններին: Շաբաթ օրը ԲՀԿ-ն հանդիպել է ՀՅԴ-ի հետ: Այս մասին այսօր լրագրողների հետ զրույցում ասաց «Բարգավաճ Հայաստան» խորհրդարանական խմբակցության քարտուղար Նաիրա Զոհրաբյանը:

Վերջինիս խոսքերով՝ քննարկումները եղել են բավականին արդյունավետ. «Կարծում ենք, որ հնարավոր է ձևավորել այն միասնական քաղաքական օրակարգը, քաղաքական հիմնախնդիրները, որոնք երկրում կարող են բերել լուրջ համակարգային փոփոխություններ: ՀՅԴ-ի հետ քննարկումները, բնականաբար, կշարունակվեն»,-ասաց Զոհրաբյանը:

Խմբակցության քարտուղարը նշեց, որ այսօր իրենք հանդիպել են ՀԱԿ-ի հետ: «Կրկին քննարկվեցին փոխադարձ օրակարգերը, թե՛ մենք էինք առաջարկել օրակարգ, և թե՛ ՀԱԿ-ը: Ես հիմա չեմ ցանկանում դետալային հրապարակել քննարկումները, որովհետև դա եղել է փակ քննարկում, կարող եմ ասել, որ փակ քննարկումները ՀԱԿ-ի հետ ևս շարունակվելու են: Այսօր կհանդիպենք նաև «Ժառանգություն» կուսակցության հետ: Ես պաշտոնապես այսօր դիմել եմ նաև ՀՀԿ-ին և ՕԵԿ-ին: Առաջարկն ընդունելու իրավունքն իրենցն է, կընդունեն առաջարկը մենք իրենց հետ ևս կքննարկենք խնդիրներ, չեն ընդունի, իրենց գործն է»,-նշեց Նաիրա Զոհրաբյանը:

Այն հարցին, թե ՀԱԿ-ի հետ բանակցություններում քննարկվել են միասնական թեկնածուի հարց, Զոհրաբյանն ասաց. «Ես կրկնում եմ, որ անձերի վերաբերյալ քննարկումներ չեն եղել: ՀԱԿ-ի հետ քննարկումներից որևէ հարցի որևէ շեշտադրմամբ, որևէ ենթատեքստով չեմ պատասխանելու, քննարկումները շարունակվելու են: ՀԱԿ-ի հետ քննարկումների մասին ավելին քան ասեցի, ոչինչ չեմ ասելու»,-նշեց խմբակցության քարտուղարը: