Լիտվայի հետ խաղում անելու ենք ամեն բան, որպեսզի հաղթենք. Մխիթարյան

«Ժողովուրդը մեր հաղթանակի կարիքն ունի»,- նոյեմբերի 12-ին Ավանի ֆուտբոլային ակադեմիայում տեղի ունեցած ֆուտբոլի Հայաստանի ազգային հավաքականի մարզումից հետո լրագրողների հետ ճեպազրույցում ասել է կիսապաշտպան Հենրիխ Մխիթարյանը, փոխանցում է NEWS.am Sport-ի թղթակիցը: 

«Լիտվայի հետ խաղում անելու ենք ամեն բան, որպեսզի հաղթենք։ Գիտենք, որ ժողովուրդը մեր հաղթանակի կարիքն ունի։ Այդ խաղով մենք ցանկանում ենք շնորհակալություն հայտնել Սարգսին, որ 20 տարի խաղացել է մեր ազգային հավաքականում։

Այլ թիմ տեղափոխվելու մասին կարող եմ միայն ասել, որ ժամանակն ամեն ինչ ցույց կտա։ Ես պայմանագիր ունեմ «Շախտյորի» հետ։ Ես խաղալու եմ և փորձելու եմ օգուտ բերել «Շախտյորին»,- նշեց Հենրիխ Մխիթարյանը։

Այն հարցին, թե արդյոք «Շախտյորի» բրազիլացի ֆուտբոլիստներն իրեն գնդակ չեն փոխանցում, Հենրիխը պատասխանեց, որ նա խաղադաշտում այդպիսի բաներ չի նկատում։ Բայց յուրաքանչյուր մարդ կարող է ունենալ սեփական կարծիք։

Ֆուտբոլիստը նաև ավելացրեց, որ «Չելսիի» հետ խաղում իր տխրությունն ու սափրված չլինելը ոչ մի բանի հետ կապ չունեին՝ «ուղղակի այդպես էր ստացվել»։

Հիշեցնենք, որ նոյեմբերի 14-ին ժամը 19:00-ին Երևանի «Հանրապետական» ստադիոնում տեղի կունենա Սարգիս Հովսեփյանի հրաժեշտի հանդիպումը՝ Հայաստանի և Լիտվայի հավաքականների մասնակցությամբ։