«BMW X5»–ն ավտովթարի հետևանքով ամբողջովին ջախջախվել է. կա 1 զոհ, 2 վիրավոր

Վերջին լուրեր 13 Նոյեմբեր, 2012 0:08

Նոյեմբերի 12-ին խոշոր ավտովթար է տեղի ունեցել Գեղարքունիքի մարզում: Ժամը 19:30-ի սահմաններում, «ԲՄՎ X5» մակնիշի ավտոմեքենայի վարորդը Երևան-Իջևան ավտոճանապարհի Ծովագյուղի հատվածում բախվել է «Մոսկվիչ» մակնիշի 34 ԼՕ 237 համարանիշի ավտոմեքենային, ապա դուրս է եկել ճանապարհի երթևեկելի մասից և գլորվելով շրջվել ջրատարը:

Ինչպես հայտնում է shamshyan.com–ը, վթարի հետևանքով, ըստ նախնական տեղեկությունների, կա 1 զոհ և 2 վիրավոր: Մահացածը կամ զինվորական է եղել, կամ ոստիկանության աշխատակից, քանի որ համազգեստով էր: Վիրավորներին առաջինը օգնություն են ցուցաբերել գյուղացիները: Կարճ ժամանակում վթարի վայր է ժամանել Սևանի շտապօգնության բուժբրիգադը և վիրավորներին տեղափոխել Սևանի բժշկական կենտրոն:

Դեպքի վայր են ժամանել Ճանապարհային ոստիկանության 2-րդ սպայական գումարտակի 4-րդ վաշտի աշխատակիցները՝ վաշտի հրամանատար Սերգեյ Հակոբյանի գլխավորությամբ: ժամանել են նաև ՃՈ 2-րդ սպայական գումարտակի հրամանատար Արսեն Արշակյանն ու հրամանատարի տեղակալ Դավիթ Ավագյանը:

Տեղում է եղել նաև Ոստիկանության Սևանի բաժնի օպերատիվ քննչական խումբը՝ Սևանի ոստիկանապետ Վիգեն Աղեկյանի գլխավորությամբ, ովքեր փորձել են պարզել մահացածի և վիրավոր անձանց ինքնությունը: Մինչ ոստիկանների ժամանումը «ԲՄՎ X5» ավտոմեքենայի համարանիշները հանվել էին, սակայն վթարի վայրում հավաքվածները ֆոտոլրագրողին պատմել են, որ ավտոմեքենայի վրա եղել է ժամանակավոր (տրանզիտ) համարանիշներ: