«Առավոտ» Արժե տեսնել, թե մարտի 1-ի և այլ մեղքերի մեջ մեղադրող ուժերը ինչպես են կանգնելու կողք կողքի

«Առավոտ»–ի հետ զրույցում, անդրադառնալով այն հարցին, թե  ի՞նչ եք մտածում ՀԱԿ-ԲՀԿ հնարավոր մերձեցման մասին, հավանական համարո՞ւմ եք, որ իրականություն կդառնա Լևոն Զուրաբյանի հայտարարությունը միասնական թեկնածուով հանդես գալու մասին, և արդյոք ՀԱԿ-ի և ԲՀԿ-ի հնարավոր միասնական թեկնածուն ՀՀԿ-ի թեկնածուի համար լուրջ այլընտրանք կդառնա՞, Ազգային ժողովի պատգամավոր Մարգարիտ Եսայանն սաց. «Կարծեմ, նոր բան չեմ ասի, եթե հիշեցնեմ, որ քաղաքականությունն առանց ինտրիգի ոչինչ է, իսկ քաղաքական այն ուժերը, որոնք տվյալ պահին չունեն իշխանական լծակներ և խնդիր ունեն փրկել և պահպանել սեփական դիմագիծը, առանց ինտրիգի դատապարտված են մոռացության: Եվ քանի որ նախընտրական շրջան է, չափազանց կարևոր նախագահական ընտրություններից առաջ քաղաքական տարբեր ուժեր ինքզինքը փրկելու և ինքնադրսևորվելու խնդիր ունեն, ուստի տարբեր ձևաչափերով հանդիպումների, քննարկումների, իրենց անվան շուրջը իբր տեղեկատվական դաշտ ստեղծելու փորձեր են անում: Ձեր նշած ուժերի վերջին օրերի ռևերանսները դիտարկում եմ հենց այդ հարթությունում և մտածում եմ, որ քաղաքականությունը, ի թիվս այլ խնդիրների, նաև բառերի արվեստ է, բառերով տարբեր հորինած հնարավորություններ ստեղծելու, հասարակությանը տարբեր հնարավոր և անհնարին սցենարներ նետելու արվեստ, ինչը և տեսնում ենք վերջին օրերին:

Համոզված եղեք, պղտորված ջրերը կպարզվեն հենց պղտորողների ձեռամբ և ամեն ինչ իր տրամաբանական վիճակին կհանգի: Իսկ ինչ-որ միասնական թեկնածուի մասին խոսելը կամ կարծիք հայտնելը անլուրջ եմ համարում, քանի որ ես սովոր եմ խոսել եղած և իրական բաների մասին, իսկ այն, ինչ ֆանտաստիկայի ժանրից է, կներեք' իմը չէ: Ես իրատես եմ, իսկ իրականությունն այն է, որ Հանրապետականի թեկնածուն միակ լուրջ և անհրաժեշտ թեկնածուն է»:

Տիկին Եսայանը նաև հավելեց. «Ի դեպ, եթե այդ «միասնականը» հնարավոր լինի, բավականին զվարճալի վիճակ կստեղծվի, և արժե տեսնել, թե միմյանց մարտի 1-ի և այլ մեղքերի մեջ մեղադրող ուժերը ինչպես են կանգնելու կողք կողքի՝ հասարակության առջև, որի 10 զավակները զոհվեցին այդ ողբերգական դեպքերի ժամանակ»: