«ՀԺ». Վերաքննիչ դատարանը ուժի մեջ կթողնի՞ 1-ին ատյանի կայացրած վճիռը

Հայ ազգային կոնգրեսի երիտասարդ ակտիվիստներ Սարգիս Գևորգյանի, Տիգրան Առաքելյանի, Արտակ Կարապետյանի և Դավիթ Քիրամիջյանի գործով Վերաքննիչ քրեական դատարանում երեկվա նիստում դատավոր Արմեն Դանիելյանը մեծ արագությամբ մերժել է պաշտպանական կողմի 7 միջնորդությունները, դահլիճից հեռացրել է Տիգրանին, Սարգսին ու Դավիթին, երիտասարդներին պաշտպանական ճառ ու վերջին խոսք ասելու հնարավորություն չի տվել, հայտարարել է դատաքննության ավարտի մասին և հեռացել խորհրդակցական սենյակ՝ որոշում կայացնելու, որը կհրապարակվի այսօր՝ ժամը 12.00-ին:

Ըստ թերթի նիստին հետևած քաղաքացիները տպավորություն են ստացել, որ այսօրվա որոշմամբ Վերաքննիչ դատարանը ուժի մեջ կթողնի 1-ին ատյանի կայացրած վճիռը, որով երիտասարդ ակտիվիստները դատապարտվել են 2-6 տարվա ազատազրկման: Ոմանք նույնիսկ չեն բացառել, որ այսօր դատարանը որոշում կկայացնի կալանավորել մինչ օրս ստորագրությամբ ազատության մեջ գտնվող Սարգիս Գևորգյանին, Արտակ Կարապետյանին և Դավիթ Քիրամիջյանին:

Նշենք, որ Սարգիս Գևորգյանը 20 տարեկան է (նա հասունացել է համաժողովրդական շարժման մեջ, որին ակտիվորեն մասնակցում է 2008–ից մինչ օրս), Դավիթ Քիրամիջյանը 21 տարեկան է (նա նույնպես Շարժման երեխաներից է), Արտակ Կարապետյանն ու Տիգրան Առաքելյանը 31 տարեկան են (Տիգրանը նույնպես Շարժման առաջամարտիկ երիտասարդներից է): Երեկ «ՀԺ» թղթակիցը Հայ ազգային կոնգրեսի խոսնակ Արման Մուսինյանից հետաքրքրվել է՝ հնարավո՞ր է Շարժման ակտիվիստ երիտասարդների պաշտպանության համար Կոնգրեսն առաջիկայում հանրահավաք հրավիրի: Հարցը Մուսինյանին տարօրինակ է թվացել: «Հանրահավա՞ք»,- զարմացել է նա և նշել. «Էս պահին կարող եմ ասել, որ մենք հավաքվելու ենք դատարանի մոտ, ձեր թերթի միջոցով էլ բոլորին կոչ եմ անում գալ այնտեղ»: Մուսինյանը նաև պարզաբանել է, որ Կոնգրեսը երիտասարդների համար երբևէ հանրահավաք չի հրավիրվել. «Մենք 150-ից ավելի քաղբանտարկյալ ենք ունեցել, բայց հատուկ քաղբանտարկյալների համար հանրահավաք չենք արել, դա եղել է քաղաքական պրոցես»:

Այսօր, ժամը 11.00-ին Վերաքննիչ քրեական դատարանի մոտ տեղի կունենա բողոքի ակցիա՝ ի պաշտպանություն Տիգրանի, Սարգիսի, Դավիթի և Արտակի: