Համախմբվենք ու՞մ շուրջ․ թշնամու օրակարգը սպասարկող խմբի շու՞րջ․ Արծվիկ Մինասյան

Այսօր ԱԺ-ում լրագրողների հետ ճեպազրույցի ընթացքում ընդդիմադիր պատգամավոր Արծվիկ Միանասյանն անդրադարձել է օրերս որպես բարի կամքի դրսևորում՝  Հայաստանի կողմից ադրբեջանցի գերեվարված զինծառայողին Բաքվին հանձնելու որոշմանը, որի արդյունքում այս պահի դրությամբ գերիների փոխանակում տեղի չի ունեցել․

«Սա ստրկացված իշխանության վարքագծի դրսևորում է․ չկա ոչ մի արժանապատվություն, ավելին՝ այս վարքագծով արդեն ողջ ազգի, պետության արժաապատվությունն է շպրտել այս իշխանությունը գետնի վրա։ Դա գալիս է հենց Փաշինյանի էությունից, նա ինքը իր վարքագծով երբեք չի հանդուրժում ոչ միայն բարեկամությունը, նաև եղած դաշնակցային հարաբերությունները վերածում է թշնամականի, թշնամիներին էլ ավելի է կատաղեցնում, դարձնում վայրենի։

Այն, ինչին ականատես եղանք, ինչպես Փաշինյանը իր կյանքն է ապրում, նույն ձևով էլ մեր ազգին է պարտադրում․ ներքին թշնամանք սերմանելուց սկսած՝ ավարտված պետության նկատմամբ նման ագրեսիվ վարքագիծ ձևավորելով։ Նա իր քաղաքականությունը տանում է ընդդեմ ՀՀ-ի, ընդդեմ Արցախի Հանրապետության, ընդդեմ հայ ժողովրդի։ Իրենց բնույթն է այդպիսին, օտարի օրակարգով ապրող իշխանություն են, սեփական աթոռը պահելու, վայելքներից օգտվելու նպատակադրում ունեն»,- նման կարծիք հայտնեց Մինասյանն ու մեկ այլ հարցի՝ արդյոք այս իշխանության շուրջ համախմբվել կարելի՞ է, պատասխանեց․

«Մենք 2018-ից հետո, նաև 2020-ին իրականացրել ենք այդ գործողությունը, բայց արդյունքում ստացել ենք ուրացում, կործանում։ Հետևաբար, համախմբվես ու՞մ շուրջ, օտարի, թշնամու օրակարգը սպասարկող խմբի շու՞րջ, որ վերջանականապես կործանե՞ս երկիրդ»,- արձագանքեց նա։