Պեմզաշենի սպանության դատական գործը չի տեսանկարահանվի․ դատավորը բավարարեց մեղադրյալի միջնորդությունը

Այսօր ընթանում էր Պեմզաշենի դաժան սպանության գործով հերթական դատական նիստը, որի ընթացքում դատավորը հայտնեց, որ մեղադրյալներից Վրույր Բարսեղյանի փաստաբան Էդուարդ Աղաջանյանը միջնորդություն է ներկայացրել՝ արգելելու լրատվամիջոցներին և դատական նիստի դահլիճում գտնվող բոլոր անձանց տեսաձայնագրել, տեսանկարահանել, ինչպես նաև հեռարձակել նիստը։

Դատավորի խոսքով՝ «Դռնբաց դատական նիստի ժամանակ դատարանը թույլատրել է, որ լրագրողները տեսաձայնագրեն, տեսանկարահանեն և հեռարձակեն, որպեսզի հանրությունը տեղեկացված լինի նիստում կատարվող դեպքերին, բայց քանի որ ապացույցների հետազոտման ժամանակ պետք է հարցաքննվեն այլ վկաներ, այս դեպքում ստացվում է՝ նրանք արդեն իսկ կիմանան՝ իրենցից առաջ ովքեր են հարցաքննվել, ինչ ցուցմունքներ են տվել։ Այստեղ գործի բազմակողմանի, օբյեկտիվ քննության խախտում կարող է տեղի ունենալ»,- նկատեց դատավորը։

Մեղադրյալ Արկադի Բարսեղյանն իր խոսքում նշեց՝ «Ես կուզեմ, որ սաղ նկարահանվի, սկզբից մինչև վերջ՝ մանրամասն։ Կուզեմ, որ սաղին պարզ լինի, որ ես ոչ մի կապ չունեմ էս ամեն ինչի հետ, էսի սաղ հորինած հեքիաթ է»։ Իսկ մյուս մեղադրյալ Վրույր Բարսեղյանն ասաց, որ չի ցանկանում, որպեսզի նիստը նկարահանվի։

Դատարանը որոշեց միջնորդությունը բավարարել։