«Էսօր իմ օրն ա եկել խոսելու». Միհրան Պողոսյան

ԱԺ նախկին պատգամավոր, ԴԱՀԿ ծառայության նախկին պետ Միհրան Պողոսյանին «Mediahub»-ի թղթակիցը անհարմար հարցեր ուղղեց. «Դուք համարվում եք սկանդալային գործիչ, վերջինը կոկայինի դեպքն էր: Ձեր մասին շատ է գրվել` էլ օֆշորային սկանդալ, էլ արդարադատության նախարարների հետ յոլա չգնալ, մեկին ծեծում եք, մյուսին կոպտում եք, հանում եք սենյակից, էն 4-րդին, իհարկե, ծաղիկներով դիմավորեցիք, դա բացառություն էր: Դրանից հետո պատգամավոր դարձաք, քրեական գործեր, հետո` Մոսկվա: Էս ամեն ինչը ձեր շուրջը որ կա, ինչպե՞ս եք կարողանալու հանրությանը համոզել, որ իրականում ձեր կերպարն այդպիսին չէ»:

«Ձեր ասածների մեջ բազում անճշտություններ կային: Էսօր իմ օրն ա եկել խոսելու: Նախկինում շատ բան չեմ կարողացել խոսել, որովհետև լինելով իշխանության մեջ` ամեն ինչ չի, որ պետք է և կարող ես հանրայնացնել: Մենք 10 տարում կարողացել են ստեղծել աշխատող կառույց»,- ասաց Միհրան Պողոսյանը:  

Նա նշել է, որ 5 տարի գտնվելով ՀՀ-ից դուրս՝  Ռուսաստանում, զբաղվել է տարբեր բիզնեսներով։

«Զուգահեռ ապրել եմ նաև Հայաստանի կյանքով և ամեն օր ապրում եմ Հայաստանի կյանքով։ Մեր իրականությունն այն է, որ գործող իշխանությունները հմուտ կերպով կարողացան բոլոր այն ուժերը, ովքեր, որ կարող են դիմակայեն այս մեծ աղետին, ինչը որ տեղի ունեցավ մեր հանրապետությունում՝ մեր երկու հայկական պետություններում՝ Արցախում և Հայաստանում։

Մարդկանց, ովքեր կարող էին դիմագրավել այս մեծ արհավիրքին, մի մասին իրենք նստացրին բանտերը և մյուս մասը, ով հասցրեց, դուրս եկավ երկրից։

Ես հանդիսանում եմ 2-րդ մասի ներկայացուցիչը և ժամանակին կարողացա դուրս գալ և չհայտնվել բանտում։ 

Ես չեմ փախել Հայաստանից, ես չեմ կարող իմ տնից փախնել։

Իմ հնարավորությունները ՀՀ-ի համար ինչ-որ բան անելու շատ ավելի մեծ են, ոչ բանտում գտնվելով,  թեկուզ արտերկրում ապրելով։

Միչև վերջերս, ես լինելով Հանրապետական կուսակցության անդամ, ես հնարավորինս չափ, իմ թիմի հետ միասին աջակցել և փորձել եմ այս արհավիրքը կանխելու, ավելին՝ առաջին օրերին, երբ սկսեց 44-օյա պատերազմը, ես անգամ գրավոր դիմեցի գործող վարչապետին, որ թույլ տան գամ ՀՀ, այնտեղից ուղևորվեմ Արցախ։ Գրավոր դիմեցինք և գրավոր ստացանք բացասական պատասխան»,– ասել է Պողոսյանը։

Նա նաև նշել է, որ դիմում է գրել և դուրս եկել ՀՀԿ–ից, ինչպես նաև նոր կուսակցություն է բացել։