Մահացել է Dragon Ball-ի հեղինակ Ակիրա Տորիյաման

68 տարեկան հասակում մահացել է ճապոնական մանգայի նկարիչ Ակիրա Տորիյաման՝ աշխարհահռչակ Dragon Ball և Dr Slump անիմե ֆրանշիզայի հեղինակը։

X սոցիալական ցանցում նրա հրատարակչության և ստուդիայի հայտնած տվյալներով՝ Տորիյաման մահացել է մարտի 1-ին։ Մահվան պատճառը սուր սուբդուրալ հեմատոման է։

«Մենք խորապես վշտացած ենք նրա մահվան անսպասելի լուրից: Ցանկանում ենք հարգանքի տուրք մատուցել նրա մեծ ձեռքբերումներին, մեր երախտագիտությունը հայտնել նրան և մեր անկեղծ ցավակցությունը հայտնել նրա ընտանիքին», - ասել է հրատարակիչը մամուլի հաղորդագրության մեջ։

Ակիրա Տորիյաման ծնվել է Նագոյայում (կենտրոնական Ճապոնիա)՝ 1955 թվականին, և առավել հայտնի է 1984 թվականին թողարկած իր Dragon Ball մանգայով, որը պատմում է մարտարվեստի առաջամարտիկ Սոն Գոկուի մանկության և արկածների մասին: Այն հիմնված է 16-րդ դարի չինական «Ճանապարհորդություն դեպի արևմուտք» վեպի վրա:

Այս մանգան հետագայում հարմարեցվեց հեռուստատեսության, կինոյի և տեսախաղերի համար։ Այն նաև ունեցավ բազմաթիվ շարունակություններ, օրինակ՝ Dragon Ball Z-ը և Dragon Ball Super-ը:

Ակիրա Տորիյաման նաև բազմաթիվ այլ մանգա շարքերի հեղինակ է, այդ թվում՝ Dr. Slump-ը: Խոսքը վիթխարի հզորությամբ փոքրիկ անդրոիդ աղջկա մասին է, որին ստեղծել է գիտնականը։