«Կապան քաղաքը չկա ըստ էության․ 2020-ին Վաղարշակ Հարությունյանը Փաշինյանի հետ ստորագրել է դելիմիտացիան»

Մարտի 13-ին Ազատության հրապարակում սպասվող հանրահավաքի առնչությամբ այսօր «Միասին» շարժման անդամները ասուլիս էին հրավիրել։ Նրանց պահանջը ՀՀ ներկայիս իշխանության հեռացումն է։ 

Իր խոսքում ՀՀ նախկին վարչապետ Հրանտ Բագրատյանն անդրադարձել է իշխանության վարած անվտանգային քաղաքականությանը․ 

«Հասկացեք, եթե Իջևանի գյուղերն էլ են տալիս, դեպի Վրաստան և Իրան ճանապարհները վերահսկողության տակ են լինելու։ Դեպի Իրան ճանապարհն արդեն վերահսկողության տակ է․ օդանավակայանում ճանապարհից 20 մետրի վրա է ադրբեջանական գնդացիրը դրած, փորձես մի հատ թնդանոթ անցկացնես՝ խփելու են։

էն որ լոպազ-լոպազ խոսում են, թե հատուկ խնդրել են Ադրբեջանին, որ թույլ տան մեկ-երկու ինքնաթիռ Կապանի օդանավակայանում իջնի․․․ Կապանի օդանավակայան դուք չե՛ք կարող իջնել, որովհետև ստորագրել եք, էդտեղ դելիմիտացիայա արված, 2020 թվականի դեկտեմբերի 18-ին մի զգալի հատված Վաղարշակ Հարությունյանը՝ Փաշինյանի հետ համաձայնեցված, ստորագրել է Ադրբեջանի հետ, Կապան քաղաքը չկա ըստ էության»,- նման հայտարարությամբ հանդես եկավ նախկին վարչապետն ու պնդեց՝  ցանկացած պահի առավոտյան մեզ ասելու են՝ փակ է այլևս Կապանի մուտքը, իսկ եթե  Կապանի մուտքը փակվեց, դեպի հարավ՝ Մեղրի, Քաջարան մուտքը ևս փակվելու է։

Բագրատյանի տեսակետով, եթե Տավուշը ևս տալիս են՝ հանրապետությունը հայտնվում է բլոկադայի մեջ․

«Թուրքիան էլ էն կողմիցա ասում՝ «այդքան էլ տենց չի, որ ես Հայաստանի տարածքները ճանաչում եմ»։ Ենթադրում եմ՝ նկատի ունի արևմտյան սահմանները՝ նախկին Ղուկասյանի և Ամասիայի շրջանները։

Կտրում են մեզ․ սկզբից լինելու է լրիվ բլոկադայի մեջ, ոնց Արցախն էր բլոկադայի մեջ, տենց էլ Հայաստանն է լինելու։ Սա չտեսնելու համար պետք է կույր լինել, բա մենք ինչի՞ համար ենք քաղաքական գործիչ, որ սա բացատրենք ժողովրդին»,- թեման ամփոփելով՝ նկատեց նա։