Փորձելու եմ մուտք գործել քաղաքապետարան, տեսնենք՝ ինչպես է ոտիկանությունը այս ապօրինի որոշումը կատարում․ Հայկ Մարության

Այս պահին Երևանի քաղաքապետարանի դիմաց տրանսպորտի թանկացումների դեմ բողոքի ակցիա է ընթանում։ Երևանի նախկին քաղաքապետ Հայկ Մարությանը լրագրողների հետ զրույցում նման հայտարարությամբ է հանդես եկել․

«Երևանի ավագանու նիստերին քաղաքապետի կամ ավագանու խմբակցության հրավերով կարող են մասնակցել, ելույթներ ունենալ և պատասխանել հարցերին նաև այլ անձինք։ Մեր խմբակցությունը դիմել է, որպեսզի ես մասնակցեմ և ելույթ ունենամ, սակայն մեր դիմումին եկել է մերժում։

Հիմնավորումը շատ տարօրինակ է․ հիմնավորում են, որ կա ինչ-որ շատ տարօրինակ և ապօրինի փաստաթուղթ, որը կնքվել է քաղաքապետարանի աշխատակազմի և Պետական պահպանության գլխավոր վարչության միջև, որ ավագանու նիստերի ժամանակ բացի ավագանու անդամներից և աշխատակազմից այլ անձ չի կարող մուտք գործել քաղաքապետարանի շենք։

Սա մաքուր ապօրինություն է, որովհետև, օրենքում հստակ ասված է, որ երրորդ անձինք ևս կարող են գալ։ Հիմա, այնուամենյանիվ, ես փորձելու եմ մուտք գործել քաղաքապետարան, տեսնենք՝ ինչպես է ոտիկանությունը այս ապօրինի որոշումը կատարում։ Միգուցե վերջին պահին հասկանան, որ սա ապօրինություն է և թույլ տան, որ ես ներս մտնեմ, եթե ոչ՝ այստեղ փոքրիկ պրես-կոնֆերանս կանենք»,- տեղեկացրեց Մարությանը։