Եթե ուզում են քաղաքի ծանրաբեռնվածությունը թեթևացնել՝ թող Կառավարությունը տանեն․ ակցիայի մասնակից

Այս պահին ընդդեմ Երևանի Կոմիտասի անվան պետական կոնսերվատորիայի փակման ընթանում է բողոքի ակցիա՝ շենքի դիմաց։ Այսօր ռեկտորը հրավիրել է քննարկում՝ համայնքին հուզող թեմաները քննարկելու նպատակով։ 

Հիշեցնենք՝ Ակադեմիական քաղաքի շրջանակներում միավորելու և խոշորացվելու են բուհեր ու գիտական կազմակերպություններ։

Լրագրողների հետ զրույցում «Հայաստանի ժողովրդական շարժում» հասարակական կազմակերպության ղեկավար Վազգեն Պետրոսյանը իր վրդովմունքն արտահայտեց այս որոշման դեմ․ 

«Կրթական համակարգն ուզում են քանդել, այս շենքը ուզում են սարքել հյուրանոց։ Դրա փոխարեն պետք էր զարգացնել՝ հինը պահպանելով, օգտագործել բոլոր հնարավորությունները։ Եթե ուզում են քաղաքի ծանրաբեռնվածությունը թեթևացնել, թող Կառավարությունը տանեն, դա շատ ավելի հեշտ և հանգիստ կլինի»,- նշեց ակցիայի մասնակիցն ու թեմայի վերաբերյալ խոսքը շարունակելով նկատեց՝

«Այս իշխանությունը ժողովրդին զբաղեցնելու համար ժամանակ առ ժամանակ ստեղծում է մի կոնֆլիկտ, նախապես իմանալով, թե ինչպիսի հակազդեցություն է լինելու։ Ներկա փուլում գնում են Տավուշից գյուղեր հանձնելու, զուգահեռաբար՝ Կոնսերվատորիայի և այլ բուհերի շենքերը վաճառելու»,- նման տեսակետով հանդես եկավ Պետրոսյանը։

Նաև նաև տեղեկացրեց՝ վաղը ԿԳՄՍ շենքի դիմաց շարունակելու են բողոքի ակցիան։