Օդի տուրքը միայն Հայաստանում չէ, տարբեր երկրներում այս կամ այն կերպ կիրառվում են. ՏԿԵՆ փոխնախարար

Այսօր ԱԺ տնտեսական հարցերի մշտական հանձնաժողովի հերթական նիստի ընթացքում քննարկվում էր Կառավարության կողմից ներկայացված «Պետական տուրքի մասին օրենքում լրացում կատարելու և ավիացիայի մասին օրենքում լրացում կատարելու մասին» օրենքների նախագծերի փաթեթը։ Հիմնական զեկուցողը Տարածքային կառավարման  և ենթակառուցվածքների նախարարի տեղակալ Արմեն Սիմոնյանն էր։

ՔՊ-ական պատգամավոր Բաբկեն Թունյանը հանդես եկավ հարցադրմամբ, նրան հետաքրքրում էր՝ ինչպե՞ս է աշխատել երեք տարի առաջ կատարված փոփոխությունը՝ ըստ որի՝ օրենքով օդի տուրքի հետ կապված բացառություն սամանվեց և նոր ուղղությունների համար օդի տուրքը հանվեց։

Արմեն Սիմոնյանն ի պատասխան արձագանքեց․

«Օդի տուրքի մասով անցած տարի մոտ 17 մլրդ դրամի կարգի գումար է հավաքագրվել, որը գանձվում է ՀՀ տարածքից ելք անող ֆիզիկական անձանցից՝ ավիաընկերությունների կողմից․ այնտեղ կան որոշակի արտոնություններ՝ կապված շառավղի մասով։ Նշեմ, որ օդի տուրքի արտոնությունը աշխատել է, և բավականին ուղղություններով մենք ունենք հստակ ուղևորահոսք։

Տարբեր երկրներում օդի տուրքը տարբեր մեխանիզմներով կիրառվում է, տեղեր կան, որ օդի տուրք չի կիրառվում, այլ կիրառվում են համայնքների կողմից օրինակ՝ հյուրանոցային տուրքեր, երբ զբոսաշրջիկը ժամանում է երկիր՝ վճարում է կատարում հյուրանոցում համապատասխան հարկի ձևով։ Մեր պարագայում այսպես թե այնպես մուտքի վրա օդի տուրք չենք կիրառում, այլ կիրառում ենք ելքի վրա»,- մանրամասնեց փոխնախարարը։