Կրեմլն արձագանքել է Փաշինյանի` ՀԱՊԿ-ից Հայաստանի դուրս գալու մասին խոսքերին

Ռուսաստանը մտադիր է բանակցություններ վարել Հայաստանի հետ՝ պարզելու իրավիճակը Հավաքական անվտանգության պայմանագրի կազմակերպությունից (ՀԱՊԿ) երկրի հնարավոր դուրս գալու հետ կապված։ Այս մասին ճեպազրույցում ասել է ՌԴ նախագահի մամուլի քարտուղար Դմիտրի Պեսկովը, ում խնդրել են մեկնաբանել ՀՀ վարչապետ Նիկոլ Փաշինյանի խոսքերն այն մասին, որ Հայաստանը մտադիր է դուրս գալ ՀԱՊԿ-ից, փոխանցում է Gazeta-ն։

«Մենք լսել ենք այդ հայտարարությունները։ Ակնհայտ է, որ շատ աշխատանք կա անելու: Մեզ անհրաժեշտ են շփումներ ինչպես ՀԱՊԿ շրջանակներում, այնպես էլ երկկողմ մակարդակով մեր հայ գործընկերների հետ։ Մենք կպարզաբանենք իրավիճակը և կխոսենք վարչապետի հայտարարություններին համապատասխան», - ասել է Պեսկովը։

Նա նաև պարզաբանել է, որ Փաշինյանի խոսքերի հետ կապված ՀԱՊԿ արտակարգ գագաթնաժողովի հնարավոր հրավիրման մասին որոշումը կկայացնեն կազմակերպության ներկայացուցիչները։

Մարտի 12-ին ՀՀ վարչապետ Նիկոլ Փաշինյանը հայտարարել էր, որ ՀԱՊԿ-ը հավաստիացրել է Երևանին Ադրբեջանի հետ սահմանին խաղաղապահներ տեղակայելու պատրաստակամության մասին, սակայն չի նշել հանրապետությունում իր պատասխանատվության ոլորտը։ Վարչապետի խոսքով՝ Երևանը խնդրում է ՀԱՊԿ իր գործընկերներին պատասխանել, թե որտեղ է գտնվում պատասխանատվության այդ ոլորտը, հակառակ դեպքում՝ Հայաստանը կլքի կազմակերպությունը։