ԵԽ բանաձևերը A4 ֆորմատի վրա գրված թղթեր են․ մեզ էմոցիոնալ ճառեր պետք չեն․ Զոհրաբյան

Այսօր լրագրողների հետ ճեպազրույցի ընթացքում ԱԺ նախկին պատգամավոր Նաիրա Զոհրաբյանն անդրադարձել է Եվրախորհրդարանի նիստում ընդունված բանաձևին, որով առաջարկվում է դիտարկել հնարավորությունը Հայաստանին տրամադրել Եվրոպական միության անդամակցության թեկնածուի կարգավիճակ․

«Օրինակ՝ Եվրոպական խորհրդարանի վերջին բանաձևում կոչ էր արվում Եվրոպական միությանը դադարեցնել Ադրբեջանի հետ գազային պայմանագրերը․ դադարեցրե՞ց, իհարկե չդադարեցրեց։ Այսինքն՝ այս բանաձևերը ընդամենը A4 ֆորմատի վրա գրված թղթեր են, եթե կիրառական հետագա գործառույթ չեն ունենալու, ինչպես օրինակ՝ ՄԱԿ-ի դատարանի բանաձևը՝ բացել Լաչինի միաջանցքը, բացվե՞ց միջանցքը, այո՛, բացվեց Արցախը հայաթափելու համար։

Մարտի 19-ին Եվորպական խորհրդարանում կարևոր քննարկում է նախատեսված, որը վերաբերելու է Ադրբեջանի բանտում պահվող մեր ռազմագերիներին և Արցախի քաղաքական էլիտային։ Ես հույս ունեմ և հիմա դիմում եմ ԵԽ իմ գործընկերներին՝ մեզ էմոցիոնալ ճառեր պետք չեն, թղթի վրա գրված հայտարարություններ պետք չեն, Բաքվի բանտում մեռնում է Արցախի ղեկավարությունը, մեռնում են այն ռազմագերինեը, ովքեր մի քանի տարի է բանտված են բերդում։

Ամեն ինչ արեք այդ մարդկանց ազատելու համար, ոչ թե ձեր լռությամբ խնդիրը հասցրեք այնտեղ, որ բարոյական, ֆիզիկական, անմարդկային ճնշումների տակ Արցախի էլիտայից կորզեն նվաստացուցիչ հարցազրույցներ։ Ես մեծ հույսեր չունեմ, բայց ուզում եմ ակնկալել գոնե ռազմագերիների հարցում ադեկվատ լուծում ստանալ։

Եթե ոչ, ապա մայիս ամսին Արցախի քաղաքական ղեկավարության դատավարությունն է լինելու Բաքվում, և ես շատ վատ կանխատեսում ունեմ նրանց հետագա ճակատագրի մասով»,- թեմայի վերաբերյալ իր դիտարկումներն ու մտահոգությունները ներկայացրեց Զոհրաբյանը։