Այս գործը ափալ-թափալ սարքվել է․ ընդհատում եք, թողե՛ք վերջացնեմ․ Աշոտյանը՝ դատավորին

Հակակոռուպցիոն դատարանում շարունակվում է Հանրապետական կուսակցության փոխնախագահ, Կրթության և գիտության նախկին նախարար Արմեն Աշոտյանի գործով դատական նիստը, որի ընթացքում Աշոտյանը հայտարարությամբ հանդես եկավ․ 

«Նախաքննության փուլում, գործի հարուցման պահից մինչև իմ ձերբակալություն և դրանից հետո, գործը, պարզապես, ափալ-թափալ սարքվել է։ Նորից կրկնեմ փաստարկներս․․․»,- ասաց նա, սակայն դատավորն ընդհատեց նրան ու նկատեց՝ նույն բանը երեք դատական նիստերի ժամանակ ասվել էր, սա արդեն չորրորդ անգամն է։ Աշոտյանն էլ իր հերթին պատասխանեց․

«Մի՛ խանգարեք, ընդհատում եք, թողեք վերջացնեմ, ես անընդհատ սա ասելու եմ․ նախաքննությունում 2 տուժող են բերել, 2-ն էլ կիսատ-պռատ փաստորեն։ Չի՛ կարող լինել տուժող, ու այդ տուժողը ներկայացված չլինի։ Ինձ մեղսագրվող արարքների առյուծի բաժինը հօդս է ցնդում միանգամից, որովհետև տուժողը չկա, այս հարցի լուծումը չտվեցիք։ 

Դուք չե՛ք կարող ճանաչել կազմակերպությանը տուժող ու այդ տուժողը այստեղ ներկայացված չլինի։ Կա՛մ էդ տուժողին նորից բերեք այստեղ, նստեցրեք, կա՛մ վերացրեք քաղաքական պատվերի շրջանակներում այդ կազմակերպությանը տուժողների ցանկում ներառելուց և հետո վերանայե՛ք մեղադրանքները»,- իր խոսքը նման դիտարկումներով  ամփոփեց Աշոտյանը։