Ազդարարման մեխանիզմների կատարելագործում, անանունության ապահովում. քննարկվել են համապետական արշավի նոր բաղադրիչները

Արդարադատության նախարարությունը` ԱՄՆ Միջազգային զարգացման գործակալության «Հայաստանի բարեվարքություն» ծրագրի և Գերմանական միջազգային համագործակցության ընկերության հետ գործակցությամբ, նախաձեռնել էր ազդարարման համապետական արշավի համակարգման հանդիպում՝ նպատակ ունենալով ամրապնդել ազդարարման խթանման ուղղությամբ գործադրվող միասնական ջանքերը: Այս մասին հայտնում է ՀՀ արդարադատության նախարարությունը:

 

Արդարադատության նախարարի տեղակալ Կարեն Կարապետյանը բացման խոսքում նշել է, որ Կառավարության քաղաքականության առաջնահերթություններից մեկը` կոռուպցիայի դեմ հանրային անհանդուրժողականության դրսևորումը, կոռուպցիայի դեմ պայքարի դեռևս կարևորագույն հիմնաքարարերից մեկն է, որը ենթադրում է հասարակության կողմից ոչ միայն գախափարական աջակցություն, այլ նաև կոռուպցիոն երևույթներին դեմ պրոակտիվ արձագանքում։ Նախարարի տեղակալն ընդգծել է, որ այս գաղափարի իրագործման տեսանկյունից իր ուրույն տեղն ունի ազդարարման ինստիտուտը, որը ժամանակակից ժողովրդավարական հասարակություններում կարևոր և գործուն մեխանիզմ է՝ մեկտեղելու հասարակության և պետության ջանքերը կոռուպցիայի դեմ պայքարի շրջանակներում: