Ստոլտենբերգի այցը Հայաստան Ռուսաստանի Դաշնության հետ հարաբերությունների մեջ սեպ խրելու փորձ էր. Զախարովա

«Սա Հարավային Կովկասի հանրապետություններին եվրատլանտյան ազդեցության գոտի ներքաշելու փորձի հերթական դրսևորումն է»։ Այս մասին շաբաթական ճեպազրույցում հայտարարել է ՌԴ ԱԳՆ պաշտոնական ներկայացուցիչ Մարիա Զախարովան՝ մեկնաբանելով ՆԱՏՕ-ի գլխավոր քարտուղար Յենս Ստոլտենբերգի այցը Բաքու, Թբիլիսի և Երևան։

«Եվ ՆԱՏՕ-ի, և ՆԱՏՕ-ի անդամ երկրների կողմից փորձեր են արվել առանձին-առանձին երկար ժամանակ և համակարգված: ՆԱՏՕ-ի նման մակարդակի պաշտոնյայի վերջին այցը հաստատում է, որ այս ոլորտում ակտիվությունն աճել և բազմապատկվել է: 

Արևմուտքին չի բավարարում այդ պետությունների և Ռուսաստանի միջև հավասար, փոխադարձ հարգանքով և տարածաշրջանում գլոբալ խաղաղությանն ուղղված հաղորդակցության փաստը: Այստեղից էլ բխում են ՆԱՏՕ-ի և դրան միացած Եվրամիության շարունակական փորձերը՝ խթանելու տարածաշրջանի պետությունների հարաբերությունների խզումը թե՛ միմյանց, թե՛ Մոսկվայի հետ, և սրել իրավիճակը մեր հարավային սահմանների ողջ երկայնքով։ Իհարկե առավելագույն խնդիրը նաև Անդրկովկասում մեր երկրի դեմ երկրորդ ճակատ բացելն է։

Վերջին շրջանում նկատելիորեն ակտիվացել են հայկական ուղղությամբ արևմտյան էմիսարները։ Մասնավորապես, նրանք առաջ են մղում Հայաստան-ՆԱՏՕ անհատական ​​հարմարեցված գործընկերության ծրագիրը։ Նրանց ջանքերն ուղղված են Մոսկվայի հետ Երևանի կապերը վարկաբեկելուն, լավագույն դեպքում մեր շփումներն ամբողջությամբ սահմանափակելուն, դա չեն թաքցնում արևմուտքցիները։ Հիմա նրանք ցանկանում են սեպ խրել Բաքվի հետ մեր հարաբերությունների մեջ»,- ասել է Զախարովան։