8 միլիոն եվրո գողացած թուրք կինը երեք տարի անց վերադարձել է Գերմանիա և հանձնվել ոստիկանությանը

2021 թվականի մայիսին 8 միլիոն եվրո գողացած կինը վերադարձել է Գերմանիա և հանձնվել ոստիկանությանը։ Այս մասին հայտնում է BILD-ը։

31-ամյա Յասեմին Գյունդողանը թաքնվել է գրեթե երեք տարի, սակայն ի վերջո ձերբակալվել է Բրեմենի օդանավակայանում։ Ըստ քննիչների՝ հենց նա է թալանել իր գործատուին՝ Loomis ընկերությանը, 2021 թվականի մայիսի 21-ին։ Սկզբում գողը փախել է արտերկիր, սակայն այժմ որոշել է հանձնվել իշխանություններին։ Նա Թուրքիայից թռել է Բրեմեն և մարտի 19-ին ներկայացել դատարան։ Նա այժմ կալանքի տակ է։

Հաղորդվում է, որ Գյունդողանն ընկերությունում զբաղվում էր թղթադրամների փաթեթավորմամբ, որոնք այնուհետև ֆուրգոնով տեղափոխվում էին բանկի մասնաճյուղերի բանկոմատներ: Հանցագործության օրը նա թղթադրամները չի դրել հատուկ արկղերի մեջ, այլ 8 միլիոն եվրոն դրել է տոպրակի մեջ և նետել այն աղբամանը։ Այնուհետև նա աղբ է լցրել դրա վրա՝ տոպրակները քողարկելու համար, ապա աղբամանը տարել է դուրս, ավարը դրել գողացված պետհամարանիշներով՝ վարձակալված «Mercedes Vito» մակնիշի ավտոմեքենայի մեջ, նստել ղեկին և անհետացել։

Հանցագործության մասին հայտնի է դարձել կատարվածից միայն չորս օր անց։ Քննիչները կասկածել են, որ Գյունդողանն առնչություն ունի թուրք հանցագործ ընտանիքի հետ, որը գումար է վաստակում հեռախոսային խարդախություններով, և ենթադրել են, որ նա թաքնվում է Թուրքիայում։