Ովքեր են «Կրոկուսի» վրա հարձակում գործած չորս մեղադրյալները (լուսանկարներ)

Մոսկվայի Բասմանի շրջանային դատարանի որոշմամբ «Կրոկուս Սիթի Հոլլի վրա» հարձակում գործելու մեղադրանքով երկու ամսով կալանավորվել են Ֆարիդունի Շամսիդինը, Դալերժոն Միրզոևը, Սաիդակրամի Ռաչաբալիզոդան և Մուհամադսաբիր Ֆայզովը, գրում է Gazeta-ն։

Ֆարիդունի Շամսիդինը 25 տարեկան է, ունի ութ ամսական երեխա։ Աշխատել է՝ որպես բանվոր Պոդոլսկի մանրահատակի գործարանում։ Հարցաքննության առաջին տեսանյութերում Շամսիդինն ասում է, որ ինչ-որ «քարոզչի օգնական» իրեն վճարել է 500 հազար ռուբլի «սպանություն կատարելու» դիմաց։ Նրա խոսքով՝ զենքերը ստացել է այն մարդկանցից, ովքեր կապ են հաստատել իր հետ Telegram-ի միջոցով, իսկ ահաբեկչությանը պատրաստվել է մեկ ամիս։

Դալերժոն Միրզոևը 32 տարեկան է, չորս երեխաների հայր։ Նա բազմիցս խախտել է Ռուսաստանի Դաշնության միգրացիոն օրենսդրությունը և 2011 թվականից գտնվել է իրավապահ մարմինների տեսադաշտում։ Աշխատել կամ պլանավորել է աշխատել՝ որպես տաքսու վարորդ։ RT-ի գլխավոր խմբագիր Մարգարիտա Սիմոնյանը Միրզոևին անվանել է հարձակվողների «առաջնորդը»։

Սաիդակրամի Ռաչաբալիզոդան 30 տարեկան է, ամուսնացած է, ունի երեխա։ Թերի միջնակարգ կրթություն ունի, գործազուրկ է։ Նա չի հիշում, թե Ռուսաստանում որտեղ է գրանցվել։ Նշում է՝ «հավանաբար Պոդոլսկում»։ Ձերբակալության ժամանակ նրա ականջի մի մասը կտրել են։

Մուհամադսաբիր Ֆայզովը 19 տարեկան է, ամուսնացած չէ, երեխաներ չունի։ Ունի միջնակարգ կրթություն։ Նախկինում աշխատել է Իվանովոյի վարսավիրանոցում, որտեղ գրանցվել է։

Ձերբակալության ժամանակ Բալը վիրավորվել է և կորցրել աչքը։ Նրան բժշկի ուղեկցությամբ դատարան են բերել շտապօգնության մեքենայով՝ վերակենդանացման բաժանմունքից, և անվասայլակով բերել են դատարանի դահլիճ։ Ըստ քննիչների՝ Ֆայզովը նկարահանել է հարձակումը  և վարել է այն ավտոմեքենան, որով տեղաշարժվում էին գրոհայինները։