Բաբկեն Թունյանը հանդիպել է ԵՊՀ միջազգային հարաբերությունների ֆակուլտետի ուսանողների հետ

Այսօր տեղեկատվությունը շատ է եւ աղավաղված: Այդ ամենի մեջ ճիշտ ասելիքը կորում է: Անգամ մեդիագրագետ հասարակությունը հաճախ չի կարողանում հասկանալ, թե ինչ է ասվում, կամ արվում լրատվամիջոցների կողմից՝ տեղեկատվությունը միտումնավոր կամ ոչ միտումնավոր, սխալ ներկայացնելու պատճառով. ասել է ԱԺ տնտեսական հարցերի մշտական հանձնաժողովի նախագահի տեղակալ Բաբկեն Թունյանը խորհրդարանում մասնագիտական փորձաշրջան անցնող ԵՊՀ միջազգային հարաբերությունների ֆակուլտետի ուսանողների հետ հանդիպմանը:

Բաբկեն Թունյանը մանրամասն ներկայացրել է խորհրդարանի կառուցվածքը, գործունեությունն ու գործառույթները, օրենքների մշակման, քննարկման եւ ընդունման ընթացակարգերը:

Հարցուպատասխանի ձեւաչափով պատգամավորն անդրադարձել է մեր երկրի տնտեսության զարգացմանն ուղղված խնդիրներին, Հայաստան-ԵԱՏՄ համագործակցությանը: Ուսանողները հետաքրքրվել են նաեւ Հայաստանում նոր ատոմակայան կառուցելու անհրաժեշտությանն ու էներգետիկայի ոլորտին վերաբերող հարցերով: Բաբկեն Թունյանը նշել է, որ պետք է թուլացնել էներգիայի մեկ աղբյուրից կախվածությունը: Ըստ նրա՝ նախընտրելի է զարգացնել արեւային կայանների ավելացումը, որոնց թիվը վերջին տարիներին զգալի ավելացել է: Պատգամավորը հավելել է, որ մեր երկրին անհրաժեշտ է նաեւ նոր ատոմակայան:

Հանդիպումը տեղի է ունեցել մարտի 25-ին: