«Տաշիր»-ն ահաբեկչությունից հետո ուժեղացրել է անվտանգությունն իր առևտրի կենտրոններում

Ռուսաստանաբնակ հայազգի գործարար Սամվել Կարապետյանին պատկանող «Տաշիր» ընկերությունների խումբը մերձմոսկովյան «Կրոկուս» կենտրոնում տեղի ունեցած ահաբեկչությունից հետո իր առևտրի կենտրոններում սահմանել է ուժեղացված անվտանգության ռեժիմ՝ «ՌԻԱ Նովոստի»-ին հայտնել են ընկերության մամուլի ծառայությունից։

«Տաշիր» ընկերությունների խմբի մաս կազմող առևտրային օբյեկտները կշարունակեն գործել սովորական ռեժիմով։ Ներկայումս բոլոր օբյեկտները անցել են անվտանգության ուժեղացված ռեժիմի՝ անվտանգության լրացուցիչ աշխատակիցների ներգրավմամբ և ՌԴ օրենսդրությամբ թույլատրված բոլոր հատուկ միջոցների կիրառմամբ։ Համալիրների տարածք մուտք գործող տրանսպորտային միջոցները ստուգվում են, անվտանգության աշխատակիցներն առևտրի կենտրոններում իրականացնում են համակարգված պարեկություն»,- ասվում է մամուլի ծառայության հաղորդագրության մեջ։