«Կրոկուսի» ահաբեկչությանն աջակցելու մեջ մեղադրվող ՌԴ քաղաքացին, ով փորձում էր Հայաստան թռչել, ձերբակալվել է

Սանկտ Պետերբուրգի բնակիչ Նիկոլայ Կոնաշենոկին ձերբակալել են Պուլկովո օդանավակայանում, հայտնում է Kommersant-ը։ Ըստ հրապարակման՝ նա մտադիր էր Հայաստան թռչել Մոսկվայով։ Ավելի վաղ Նիկոլայ Կոնաշենոկը սոցիալական ցանցերում մի քանի գրառում էր կատարել Crocus City Hall-ում տեղի ունեցած ահաբեկչության մասին։ Դրանից հետո նրա կինը՝ Ռոքսանա Շատունովսկայան, հրաժարական տվեց Սանկտ Պետերբուրգի «Նյու Հոլանդիա» հասարակական տարածքի տնօրենի պաշտոնից։

«Երեկ ես երկու գրառում եմ տեղադրել Facebook սոցիալական ցանցում, որոնցից առաջինում հարց էի տալիս, թե ինչ կլիներ, եթե ահաբեկչությունը տեղի չունենար «Կրոկուսում» և Կրեմլում: Իսկ երկրորդում ես խորհում էի, թե ինչու է ահաբեկչությունը տեղի ունեցել «Պիկնիկ» խմբի համերգին, այլ ոչ թե ինչ-որ այլ երաժշտական ​​խմբի»,- բացատրել է Նիկոլայ Կոնաշենոկը։

Նրա խոսքով՝ հրապարակումները հանրության կողմից ընկալվել են՝ որպես ահաբեկչությանն աջակցող։ «Սրտագին ներողություն եմ խնդրում բոլորից։ Ես չեմ աջակցում ահաբեկչությանը։ Կատարվել է հրեշավոր հանցագործություն, որի համար մենք բոլորս սգում ենք»,- ասել է Կոնաշենոկը։

Նրա գրառումների սքրինշոթները հրապարակել էին մի շարք Telegram-յան ալիքներ։ Դրանք այժմ ջնջվել են։