«Խաղաղության մեր օրակարգի պատճառով մեզ շատ հայհոյում են». Փաշինյանը համեմատական անցկացրեց ՔՊ–ի և Քրիստոսի միջև

Մի ուղերձ կա, որի հետ կապված մեր հարաբերությունները որոշակիորեն խաթարել ենք, կամ առնվազն ճշգրտելու անհրաժեշտություն ունենք եւ դա Հիսուս Քրիստոսի հետեւյալ ուղերձն է «Երանի խաղաղարներին, որովհետեւ նրանք Աստծո որդիներ պիտի կոչվեն»: Այս մասին Արտաշատում իր կուսակիցների հետ հանդիպման շամանակ ասել է Նիկոլ Փաշինյանը:

«Իհարկե, օրվա խորհրդով փորձում եմ ընդգծել մեր ընթացիկ օրակարգը և խաղաղության օրակարգի մասին խոսել նաև: Օրվա խորհուրդն ընդգծելով՝ ուզում եմ նաև Լեռան քարոզի մի ուղերձի էլ անդրադառնամ, որում ասվում է․ «Երանի սգավորներին, որովհետեւ նրանք պիտի մխիթարվեն»: Ըստ էության, սգավորները մենք ենք, որովհետեւ մենք սգում ենք մեր հազարավոր զոհերին, որոնք մենք ունեցել ենք պատերազմների ընթացքում: Ես կարծում եմ, որ խաղաղությունը կարող է լինել մեր մխիթարությունը եւ մեր մխիթարությունը կարող է լինել ՀՀ-ն, որը լինի անվտանգ, զարգացած, ազատ եւ երջանիկ: Լեռան քարոզի ևս մեկ ուղերձ, կարծում եմ, շատ համապատասխանում է մեր ընթացիկ իրավիճակին և  ընթացիկ գործունեությանը և այդ ուղերձը հետեւյալն է․ «Երանի ձեզ, երբ ձեզ հալածեն ու նախատեն եւ իմ պատճառով ձեր մասին ամեն տեսակ սուտ, չար խոսք ասեն»: Հիսուս Քրիստոսն այսպիսով խոսում է իր և իր հետևորդների մասին և տեսնում եմ, որ խաղաղության մեր ձգտումների և խաղաղության մեր օրակարգի պատճառով մեզ շատ հայհոյում են, և բազում ստեր են ասում»,-ասաց Փաշինյանը:

Նրա խոսքով՝ ստերից ամենաարտահայտիչը այն խոսույթն է, որ ՀՀ կառավարությունը պատրաստվում է Տավուշի մարզի 4 գյուղեր հանձնել Ադրբեջանին: 

«Դա որևէ կապ չի կարող ունենալ իրականության հետ: Առիթ ունեցել եմ ասելու եւ այսօր էլ կասեմ, որ ՀՀ-ում երբեւէ չի եղել Ղըզըլհաջիլի, Խեյրիմլի, Աշաղը Աքսիպարա, Բաղանիս-Այրում անունով գյուղեր, որը չի կարելի շփոթել Բաղանիս գյուղի հետ»,- ասել է նա: