Ադրբեջանի ԱԳՆ–ն Ֆրանսիային մեղադրել է «Հայաստանին զինելու» և «տարածաշրջանում լարվածություն առաջացնելու մեջ»

«2024 թվականի ապրիլի 2-ին Փարիզում ԱՄՆ պետքարտուղարի հետ համատեղ մամուլի ասուլիսի ժամանակ Ֆրանսիայի  Եվրոպայի և արտաքին գործերի նախարար Ստեֆան Սեժուրնեի կողմից Ադրբեջանի հասցեին հնչեցված «անհիմն մեղադրանքները» տարածաշրջանում լարվածություն առաջացնելու և խաղաղության գործընթացին խոչընդոտելու Ֆրանսիայի ջանքերի վառ օրինակ են»,– այս մասին հայտարարել է Ադրբեջանի ԱԳՆ–ն:

«Անընդունելի է, որ ֆրանսիական կողմը, որը զինում է Հայաստանին և խրախուսում տարածաշրջանում միլիտարիզմը, մեղադրել է Ադրբեջանին ագրեսիվ հռետորաբանության մեջ»,– ասվում է հաղորդագրության մեջ։

Պաշտոնական Բաքուն հայտարարել է, թե «Ֆրանսիայի նման երկրների քաղաքականությունը 30 տարվա ընթացքում ոչ մի օգուտ չի բերել»։

«Ֆրանսիական կողմը պետք է հասկանա, որ քանի դեռ իր ապակառուցողական գործունեությունը չի դադարեցվել, դա օգուտ չի բերի ո՛չ Ֆրանսիայի «խաթարված իմիջին», ո՛չ Հայաստանի, որին նա ամեն կերպ պաշտպանում է»,– հայտարարել են Ադրբեջանի ԱԳՆ–ից։