Նիկոլ Փաշինյանի վարկանիշն ընկել է. ՀՀ քաղաքացիների տրամադրվածություններն ըստ վերջին հարցումների

«GALLUP International association»-ի հայաստանյան ներկայացուցչության տնօրեն Արամ Նավասարդյանը անդրադարձել է վերջին հարցումների արդյունքներին՝ ցույց տալով, թե ինչ տրամադրվածություններ ունեն ՀՀ քաղաքացիները որոշ հարցերի շուրջ: 

Հարցումները ցույց են տվել, որ վարչապետ Նիկոլ Փաշինյանի վարկանիշն ընկել է։ Ըստ հարցումների՝ ՀՀ քաղաքացիների միայն 8%-ն է դրական համարում Փաշինյանի աշխատանքը: Գրեթե 20 տոկոսը նշել են, որ ավելի շուտ բացասական է գնահատում նրա աշխատանքը, և 47,1 տոկոսը ընդհանրապես բացասական է գնահատում, ընդհանուր մոտ 75 տոկոս բացասական պատասխան է տրվել Նիկոլ Փաշինյանի աշխատանքի վերաբերյալ:

Հարցվածների 96 տոկոսից ավելին Թուրքիային և Ադրբեջանին համարում են ոչ բարեկամ երկիր. Ադրբեջանի դեպքում՝ 98 տոկոսը։ 

Որպես բարեկամ երկիր ամենաբարձր ցուցանիշը գրանցել է Ֆրանսիան՝ 78,1 տոկոսով, 12 տոկոսը չեզոք է արտահայտվել Ֆրանսիայի վերաբերյալ, իսկ 8,8 տոկոսը կարծում է, որ այն ոչ բարեկամ երկիր է: Ֆրանսիային հետևում է Հնդկաստանը՝ ևս բարձր ցուցանիշով՝ 68,5 տոկոսն է նշել, որ բարեկամ երկիր է, Իրանը՝ 57,8 տոկոսն է նշել, ԱՄՆ-ն՝ 41 տոկոսը, Չինաստանը՝ 35 տոկոսը, Վրաստանը՝ 34 տոկոս, Գերմանիան՝ 33 տոկոս, ՌԴ-ն՝ 29,7 տոկոսն է նշել որպես բարեկամ երկիր:

Տավուշի գյուղերը հանձնելուն դեմ է քաղաքացիների 90 տոկոսը։ 2,9 տոկոսը նշել է, որ միանշանակ ընդունելի է։ Ավելի շուտ ընդունելի է, կարծում է 6 տոկոսը, ավելի շուտ ընդունելի չէ, կարծում է 7,8 տոկոսը, 79,7 տոկոսը նշել է, որ ընդհանրապես ընդունելի չէ, 3,6 տոկոսը դժվարացել է պատասխանել։ Այսինքն՝ շուրջ 90 տոկոսը կարծում է, որ այս մոտեցումը ընդունելի չէ։