Համաշխարհային բրենդը հասավ Գյումրի․ քաղաքի սրտում գտնվող հյուրանոցներից մեկը կգործի Radisson Hotel Group-ի ներքո

Գյումրու պատմական կենտրոնում գտնվող երկու շքեղ ու ինքնատիպ կառույցներ՝ «Շիրազ պլազա հոթելն» և պատմաճարտարապետական մեծ արժեք ներկայացնող ալեքպոլյան բաղնիքը՝ «Ալեքսանդրա SPA»-ն, որոնց սեփականատերերը գործարարներ Արման Սահակյանն ու շվեյցարահայ Վարտան Սիրմակեշն են, շուտով կներառվեն Radisson աշխարհում հայտնի հյուրանոցային համալիների ցանցի մեջ:

Գյումրիում համագործակցության պայմանագիր ստորագրվեց աշխարհի առավել քան 115 երկրներում մոտ 1400 բարձրակարգ հյուրանոցներ ունեցող Radisson Hotel Group-ի Բիզնեսառաջխաղացման գլխավոր տնօրեն Մարիա Զնովայի և «Ալեքպոլ փրոջեքթս մենեջմենթ» (Alecpol Projects Management) ընկերության տնօրեն Արման Բարսեղյանի միջև։ Մարիա Զնովան այս իրադարձությունը համարեց անչափ կարևոր Հայաստանի, առավել ևս գեղեցիկ քաղաք համարվող Գյումրիի համար։ Նա, մանրամասնելով իրենց բրենդի պատմությունը, տարբեր երկրներում կատարած ներդրումները, նշեց, որ «Շիրազ պլազա հոթելն» իր հարմարություններով՝ շքեղ շենքային պայմաններով, դիզայնով ու որակով լիարժեք համապատասխանում է համաշխարհային հյուրանոցային ցանց մտնելու չափանիշներին։