Թբիլիսիի հայկական Սուրբ Նշան եկեղեցու հրդեհը

Հունվարի 9-ին հրդեհի հետևանքով փլուզվել էր Թբիլիսիի Սուրբ Նշան հայկական եկեղեցու հյուսիսարևելյան հատվածը: Արդեն մի քանի օր է, ինչ հայ և վրացական մամուլում հակասական տեղեկություններ են ստացվում հրդեհի պատճառների շուրջ: Վրաց պաշտոնյաներից մեկը նույնիսկ հայտարարել էր, որ հրդեհի մասին լուրերը իրականությանը չեն համապատասխանում: 

Մշակույթի նախարարությունն այսօր հայտնել է, որ Թբիլիսի է գործուղել մասնագիտական հանձնախումբ` հրդեհի հանգամանքները տեղում ուսումնասիրելու համար: Նախարարությունը հայտնել էր, որ եկեղեցում բռնկված հրդեհը մարելու ընթացքում փլուզվել է հուշարձանի հարավարեւելյան սյունը:

Հունվարի 11-ին Մայր Աթոռ Սուրբ Էջմիածնում տեղի է ունեցել Գերագույն հոգեւոր խորհրդի ժողով, որի ընթացքում քննության է առնվել Թբիլիսիի Սուրբ Նշան հայկական եկեղեցու փլուզման խնդիրը: Մայր աթոռի տեղեկատվական կետնրոնը տարածել է հայտարարություն, որում ասվում է.

 «Ցավով տեղեկացանք, որ հունվարի 9-ին փլուզվել է Վրաստանի մայրաքաղաք Թբիլիսիում գտնվող Սուրբ Նշան հայկական եկեղեցու հյուսիսարեւելյան հատվածը: Մեծապես անհանգստացած սույն փաստով եւ նկատի ունենալով Շամխորեցոց Կարմիր Ավետարան եւ Մուղնեցոց Սուրբ Գեւորգ հայկական եկեղեցիների փլուզման նախադեպերը` Գերագույն հոգեւոր խորհուրդն արտահայտում է իր խորը մտահոգությունը»:

Հիշեցնելով, որ անցած տարվա հունիսին Ամենայն Հայոց Գարեգին երկրորդ կաթողիկոսի Վրաստան  կատարած այցի ընթացքում Վրաստանի նախագահ Միխեիլ Սահակաշվիլիի եւ Վրաստանի կաթողիկոս-պատրիարք Իլյա երկրորդի հետ տեղի ունեցած հանդիպմանը հայկական կողմին հավաստիացում էր արվել, որ փլուզված եւ փլուզման վտանգի ենթակա հայկական եկեղեցիների նկատմամբ պատշաճ խնամք եւ հոգատարություն կդրսեւորվի: Հակառակ Մայր Աթոռ Սուրբ Էջմիածնի եւ Վիրահայոց թեմի կողմից հնչեցված ահազանգերի` վրացական կողմի անուշադրությունը եւ հապաղումը հրատապ խնդիրների լուծման մեջ, ցավոք, այսօր կանգնեցրել է մեզ տխուր այս իրավիճակի առջեւ»:

Գերագույն հոգեւոր խորհուրդը կոչ է ուղղում Վրաստանի իշխանություններին` «անհապաղ քայլեր ձեռնարկել փրկելու կործանումից Սուրբ Նշան հայկական եկեղեցին, հետամուտ լինել Վրաստանի մշակութային ժառանգության մաս կազմող հայկական սրբավայրերի պահպանությանն ու խնամքին եւ ընդառաջ Վիրահայոց թեմի խնդրանքին` վիրահայությանը վերադարձնել պահանջված հայկական եկեղեցիները»։