Օրինագիծը հաղթահարեց առաջին արգելքը

Րոպեներ առաջ Ֆրանսիայի Սենատում ցեղասպանությունների ժխտումը քրեականացնող օրինագիծը հաղթահարեց առաջին խոչընդոտը՝ իրավական հանձնաժողովի բացասական եզրակացությունը։ Այժմ այն ներկայացվում է Սենատի քննարկմանն ու հաստատմանը։ 

Ամբողջ քննարկման ընթացքում հնչեցին բազմաթիվ ելույթներ և´ ի պաշտպանություն, և´ ընդդեմ օրինագծի։ Դեմ արտահայտվողների հիմնական մասը որպես փաստարկ բերում էր այն, որ օրինագիծն, իբր, հակասահմանադրական է, խախտում է խոսքի ազատության իրավունքը, մի մասը, ինչպես բնապահպանները, ուղղակի անօգուտ էր համարում օրինագիծը, որոշներն զգուշանում էին Թուրքիայի հետ հարաբերությունները վատացնելուց, կար տեսակետ նաև, որ Սենատը պատմական որոշումներ կայացնելու վայր չէ, բայց հատկանշական է մի փաստ, որ անգամ չափազանց կտրուկ օրինագծին դեմ արտահայտվողները շեշտում էին, որ կասկածի տակ չեն դնում Հայոց ցեղասպանության փաստն ու իրենց ֆրանսահայ հայրենակիցների ապրած ողբերգությունը։ 

Կողմ արտահայտվողների հիմնական կարծիքներից մեկն այն էր, որ չի կարելի ենթակարգություն սահմանել այն երկու ցեղասպանությունների միջև, որոնք ճանաչված են Ֆրանսիայի օրենքներով։ Քանի որ հրեական Հոլոքոստի ժխտումը քրեորեն պատժելի է, չի կարող նույնպիսի օրենք չգործել Ֆրանսիայում նույն մակարդակով ճանաչված Հայոց ցեղասպանության համար։

Բավական թվով սենատորներ անդրադարձան օրինագծի քննարկման դրվելու քաղաքական ենթատեքստին։ Սակայն նշելով հանդերձ, որ օրինագիծը այսքան շտապ կերպով քննարկման ներկայացնելն, անշուշտ, պայմանավորված է Ֆրանսիայում առաջիկա նախագահական ընտրություներով, ոչ մի սենատոր այդ քան չարժեզրկեց օրինագիծը՝ համարելով, որ այն անդրադառնում է համամարդկային հարցերի, ինչը չի կարող չափվել մի քանի հազար քվեի հետ։

Այնուհետև տեղի ունեցավ քվեարկությունը, որով Սենատը պիտի իր որոշումը հայտներ իրավական հանձնաժողովի՝ օրինագիծը հակասահմանադրական համարելու որոշման վերաբերյալ, ինչի դեպքում միայն կարելի կլիներ օրինագիծը ներկայացնել Սենատի քվեարկությանը։ 

127 քվեարկողները ձայների մեծամասնությամբ չընդունեցին իրավական հանձնաժողովի բացասական եզրակացությունը, և օրինագիծը դրվեց Սենատի քննարկմանը։ Եվս երկու ժամ, և մենք կիմանանք՝ Սենատը հաստատո՞ւմ է օրինագիծը, թե՞ ոչ։