Նորմալ է, որ այսքան խնդիրներ ունենք Երևանում․ Ավինյան

Երևանի քաղաքապետ Տիգրան Ավինյանը հայտարարել է, որ ոչ միայն Երևանը, այլև մյուս համայնքները թերֆինանսավորվում են։

«Մի լեգենդ կար, թե Երևանը շատ հարուստ է, և ամենաշատը Երևանին են տալիս։ Ծիծաղելի թվեր են, ծիծաղելի։ Երբ նայում ես այդ տվյալները, հասկանում ես, որ նորմալ է, որ այսքան խնդիրներ ունենք։ Ամեն անգամ մենք տարեցտարի ավելացնում ենք եկամուտները, մինչդեռ մեզ տարեցտարի նվազեցնում են», - ասել է նա։

Ավինյանը նաև անդրադարձել է կոյուղու վթարների թվին՝ նշելով, որ շաբաթական 400 դեպք է գրանցվում։ «Բայց այդ վթարները, այսպես ասած, «տեր չունեն», և մենք պարտավոր ու ստիպված ենք 300 մլն դրամ հատկացնել դրանք սպասարկելու համար», - ասել է նա։

Նա տեղեկացրել է, որ հաջորդ տարվա բյուջեում նախատեսվել է 300 մլն դրամ՝ նման դեպքերում խնդիրները լուծելու համար։

Ավինյանը հանձնարարել է պարզել, թե ո՞վ է այդ խնդրի պատասխանատուն։ «Եթե ուզում են, որ մենք լինենք, դրա իրավական ձևակերպումները տանք», - ասել է նա՝ հավելելով, որ օրական բազմաթիվ նամակներ է ստանում կոյուղու վթարների մասին։ «Գումարը հատկացրել ենք, բայց վաղը դրա իրավական ձևակերպումն ի՞նչ պետք է լինի, ի՞նչ հիմքով ենք դա անում, ո՞ր լիազորության շրջանակներում։ Լավ, եկեք պայմանավորվենք, որ Երևանի քաղաքապետարանն է պատասխանատու, մենք էլ գնանք, մեր գլխի ճարը տեսնենք», - նշել է նա։

Քաղաքապետի խորհրդական Կամո Արեյանի դիտարկմանը, թե անհրաժեշտ է գույքագրում իրականացնել, Ավինյանը պատասխանել է. «Լավ, երեք տարի է՝ գույքագրում ենք։ Իմպերատիվ որոշել եմ՝ 300 մլն դրամ պետք է հաջորդ տարի հատկացնենք՝ անկախ գույքագրումից, իրավական որևէ ձևակերպումից, մեր գույքն է, թե ոչ, մենք պետք է սպասարկենք, թե չէ մարդիկ մեզանից ակնկալիքներ ունեն»։