Բելառուսը նախատեսում է հինգ տարում ստեղծել սեփական քաղաքացիական ինքնաթիռ

Բելառուսը նախատեսում է մինչև 2029–2030 թվականները ստեղծել իր առաջին քաղաքացիական ինքնաթիռը։ Այս մասին հեռուստաեթերում հայտարարել է նախագահի վարչակազմի ղեկավար Դմիտրիյ Կրուտոյը՝ ընդգծելով, որ ավիաշինությունն իրականացնում է գրեթե «զրոյից», սակայն ոլորտում արդեն արձանագրվում են արտադրության տպավորիչ աճեր։ Նրա խոսքով՝ աշխատանքները լայնամասշտաբ են և շարունակվում են համագործակցության շրջանակում մի շարք ռուսական ռազմավարական ձեռնարկությունների հետ։

Բելառուսի ավիարդյունաբերության մեջ ներգրավված են Բարանովիչի 558-րդ գործարանը, Մինսկի քաղաքացիական ավիացիայի գործարանը և Օրշայի ավիագործարանները, որոնք ներկայումս զբաղվում են առանձին արտադրական թաղամասերի կառուցմամբ՝ ներառյալ ներկման, երկարաչափ բարդ դետալների արտադրության և այլ ուղղություններ։ Վարչակազմի ղեկավարը նշել է, որ իշխանությունները արտադրողներին հանձնարարել են անցնել վերանորոգումից դեպի լիարժեք կոնստրուկտորական ու արտադրական համագործակցություն, ստեղծել նոր ինժեներական դպրոց և ստանալ անհրաժեշտ կարողություններ՝ սեփական ինքնաթիռ արտադրելու համար։

Ներկայում բելառուսական կողմը մասնակցում է նաև Ռուսաստանի հետ «Освей» համատեղ նախագծին՝ նախատեսված 19-տեղանոց ինքնաթիռի ստեղծման համար։ Չնայած ծրագիրը հայտարարվել էր ավելի քան տարի ու կես առաջ, դրա մանրամասները դեռևս չեն ներկայացվել հանրությանը։ Նախապես արտադրությունը նախատեսված էր սկսել 2026-ին, սակայն ժամկետները մի քանի անգամ փոխվել են․ ըստ գնահատականների՝ ինքնաթիռի հավաստագրումը կարող է ավարտվել միայն 2027–2029 թվականների ընթացքում։